खोज

बर्दघाट, ७ माघ । 

उद्योग व्यापार सङ्घ, बर्दघाटले आयोजना गरेको बर्दघाट एक्सपो २०८२ को तयारी तीव्र पारिएको छ ।

आगामी माघ १३ गतेदेखि २५ गतेसम्म बर्दघाट नगरपालिका को हरियाली नगर स्थित बर्दघाट मण्डप एक्सपो स्थल रहेको छ ।

विगतका वर्षहरूमा बर्दघाट महोत्सवको रूपमा बर्दघाट उद्योग वाणिज्य सङ्घले आयोजना गर्दै आएको व्यापार मेलालाई पृथक्, आकर्षक र औद्योगिक एवम् व्यवसायिक रूपले सञ्चालन गर्न उद्योग व्यापार सङ्घले एक्सपो को आयोजना गरेको मूल आयोजक समितिका संयोजक राजु न्यौपानेले बताए ।

एक्सपो को औपचारिक तयारी पत्रकार सम्मेलन पश्चात् गरिएको र पछिल्लो समय विभिन्न संघसंस्थाहरुसँग अन्तरक्रिया, सुझाव सङ्कलन र समन्वयका कार्यहरू जारी रहेको संयोजक न्यौपानेले जानकारी दिए ।

नगर भित्रका व्यवसायिक कृषक, १६ वटा वडाका वडाध्यक्ष एवम् जनप्रतिनिधि, नगरमा क्रियाशील राजनैतिक दल, नगर भित्रका बजार विकास समिति, सामुदायिक एवम् निजी विद्यालयका प्रतिनिधि, राष्ट्रिय लोक तथा दोहोरी गीत प्रतिष्ठान, व्यवसायी एवम् उद्योगीहरू, महिला उद्यमी, लघु उद्यमी र सामुदायिक वनका प्रतिनिधिहरूसँग अन्तरक्रिया कार्यक्रम गरेको छ ।

विभिन्न सरोकारवालाहरूको सल्लाह र सुझावका आधारमा बर्दघाट नगरलाई उद्योग व्यवसाय र पर्यटन मार्फत टेवा पुर्‍याउने एक्सपो को उद्देश्य रहेको संयोजक न्यौपानेले बताए ।

सरोकारवालाहरूसँगको छलफल अन्तरक्रिया र समन्वयका तयारी भइरहँदा एक्सपो स्थलको तयारी पनि तीव्र पारिएको एक्सपो सह संयोजक दिनेश न्यौपानेले जानकारी दिए । एक्सपो स्थलमा खानेपानी, विद्युतीयकरण, अस्थायी शौचालय, मैदान व्यवस्थापनका कामहरू समेत तीव्र रूपमा अघि बढेको उनले बताए ।

अहिले एक्सपो स्थलको बाउण्ड्री घेर्ने, स्टल बनाउने, सचिवालय निर्माण लगायतको काम द्रुत गतिमा भइरहेको उनले बताए । विगतका मेला महोत्सव भन्दा यस पटक दर्शकले फरक अनुभूति गर्ने सहसंयोजक न्यौपानेको दाबी छ ।

उनका अनुसार अहिले स्थानीय उत्पादन, पर्यटकीय स्थलहरूको अवलोकन, लघु उद्यमी, साना र मझौला उद्योगबाट उत्पादित वस्तुको प्रदर्शनी, विज्ञान प्रदर्शनी लगायत रहने छ ।

दर्शक आकर्षित गर्न वाटर फाउन्टेन, सेल्फी जोनहरू, विभिन्न चर्चित कलाकार र ब्यान्डहरूको प्रस्तुति समेत रहनेछ । एक्सपो मा २ सय ४० विभिन्न स्टलहरू समेत रहने उनले जानकारी दिए ।