खोज

कपिलवस्तु, १० पुस  ।

कपिलवस्तुको तौलिहवा स्थित कपिलवस्तु अस्पताल र लबनी स्वास्थ्य चौकीमा प्रजनन स्वास्थ्य किट सिक्स बि हस्तान्तरण गरिएको छ ।

आपतकालीन प्रजनन स्वास्थ्य साहायता किट भित्रको क्लिनिकल प्रसूति प्रयोजनका लागी प्रसूति सहायताका लागी तयार पारिएको किट हस्तान्तरण गरिएको हो ।

युएनएफपीएले प्रसूति सेवालाई पहुँच योग्य बनाउने उद्देश्यका साथ कपिलवस्तु अस्पताल र लबनी स्वास्थ्य चौकीमा सो किट हस्तान्तरण गरेको हो । युएनएफपीएले मात्रै उत्पादन गर्दै आएको सो किटमा प्रसूति गर्दा आवश्यक पर्ने औषधी र एक पटक प्रयोग गर्न मिल्ने डिस्पोजेवल सामाग्रीहरू रहेको हुन्छन् ।

गत आर्थिक वर्षमा सरकारी निकायमा दर्ता भएका तथ्याङ्क हेर्दा कपिलवस्तु जिल्लामा भएका  १० वटा मातृ मृत्युको घटनामा कपिलवस्तु नगरपालिकामा ३ वटा घटना भेटिएकोले कपिलवस्तु अस्पताल र जिल्लामा सबै भन्दा बढी प्रसूति सेवा दिँदै आएको लबनी स्वास्थ्य चौकीको बर्थिङ्ग सेन्टरलाई सो किट उपलब्ध गराइएको खुल्न आएको छ ।

युएनएफपीए लुम्बिनी प्रदेश कार्यालय बुटवलका कार्यालय प्रमुख राम थापाले किड्स कपिलवस्तुका कार्यकारी निर्देशक कृष्ण कुमार द्विवेदीको उपस्थितिमा कपिलवस्तु अस्पतालका स्टोर इन्चार्ज विसर्जन शर्मा, प्रसूति युनिटकी प्रमुख दुर्गा अग्रहरी र नर्स सुकमाया थापालाई सामाग्री हस्तान्तरण गरेका थिए ।

यस अघि मङ्गलवार प्रमुख थापाले लबनी स्वास्थ्य चौकीका स्वास्थ्यकर्मीलाई एक सेट किट हस्तान्तरण गरेका थिए । एक सेट प्रजनन स्वास्थ्य किटले ३ सय बढी प्रसूतिमा सहयोग मिल्ने स्वास्थ्यकर्मीहरू बताउँछन् । युएनएफपिएले आफै उत्पादन गरेको किट भएकाले प्रसूति सेवाको गुणस्तर कायम गर्न तथा गुणस्तरीय सामाग्रीका कारण बिरामीलाई सुरक्षित प्रसूति सेवा प्रदान गर्न सहजता हुने कपिलवस्तु अस्पतालका स्टोर इन्चार्ज विसर्जन शर्माले बताए ।

प्रसव सेवालाई गुणस्तरीय र पहुँच योग्य बनाउन कपिलवस्तु अस्पताल र लबनी स्वास्थ्य चौकीमा प्रजनन स्वास्थ्य किट सिक्स बि हस्तान्तरण गरिएको युएनएफपीए लुम्बिनी प्रदेश कार्यालय बुटवलका कार्यालय प्रमुख राम थापाले जानकारी दिए ।