खोज

रुपन्देहीको कञ्चन गाउँपालिका वडा नंं. ४ धौलागिरी चोकका १७ वर्षीय इशान शर्माको हत्या भएको एक साता बितेको छ ।

हत्यामा संलग्नमाथि कारबाहीको माग गर्दै स्थानीयले प्रहरी प्रशासनलाई दवाव दिएका छन् । प्रहरीले अनुसन्धान भैरहेको भन्दै धैर्य गर्न आग्रह गरेको छ । इशान शर्माको हत्या पछिल्लो उदाहरण हो । पछिल्लासमय देशैभरी अपराधका घटनामा बृद्धि भैरहेको छ ।

यस प्रकारका घटनाले व्यापार व्यवसाय गर्ने वातावरण समेत धमिलिने भन्दै बुटवल उद्योग बाणिज्य संघले समेत हत्यामा संलग्नलाई पहिचान गरी हदैसम्मको कारवाही गर्न माग गरेको छ । संघले घटनामा संलग्नलाई पहिचान गरी छिटोभन्दा छिटो कडा कारबाही गर्न र समाजमा शान्ति सुरक्षा कायम गर्न प्रहरी प्रशासनलाई आग्रह गर्दै यस्ता घटनाको निष्पक्ष र प्रभावकारी अनुसन्धानले मात्रै समाजमा शान्ति सुरक्षा कायम गर्न सघाउ पु¥याउने पनि उल्लेख गरिएको छ ।

निश्चितरूपमा जबसम्म शान्तिपूर्ण वातावरण हुँदैन तबसम्म मुलुकका अवयवहरूले काम गर्न सक्दैनन् । त्यसैपनि पछिल्लोसमय अपराधजन्य घटनामा बृद्धि भैरहेको छ । मानिसलाई जनावरको हत्या गरे भन्दा पनि सजिलै हत्या गर्ने घटनाक्रम बढ्दै गएको छ । देशकै राजधानी काठमाण्डौंदेखि तराईका विभिन्न स्थानमा भैरहेका अपराधका बर्बर घटनाले नेपाली समाज अपराध उन्मुख देखिएको छ । हत्या पनि बिभत्स ढंगले हुने गरेको उदाहरण देखिन थालेका छन् ।

यस प्रकारको समाचार सुन्दा अप्रिय र पत्याउनै गाह्रो पर्छ । देशका विभिन्न स्थानमा भैरहेका यस प्रकारका क्रुर घटनाले नेपालको राष्ट्रिय अन्तर्राष्ट्रिय रूपमै बदनामी हुने हो कि भन्ने चिन्ता हुनु अस्वाभाविक होइन । खासगरी मधेश र तराईका विभिन्न स्थानमा हुने घटनाबाट सवैले पाठ सिक्नुपर्ने अवस्था छ । समाजमा हुने निर्मम प्रकारका जघन्य अपराधका पछि धेरै कारण हुन सक्छन तर पछिल्लो सर्वेक्षणले गरिबी, अशिक्षा, अज्ञानता र अन्धविश्वासले ग्रसित नेपाली समाजमा यस प्रकारका घटना बढेको देखाएको छ । त्यसमाथि रिसइबी प्रमुख समस्याको रूपमा देखापरेको छ ।

कञ्चनमा भएको इशान हत्यामा साथीहरूबिचको इगो नै समस्या हुनसक्ने आशङ्का छ । ऋण तिर्न नसक्दा हुने हत्याका घटनादेखि बदलाको भावनाले आपराधिक मनोबृत्ति बढिरहेको छ । त्रासदीका घटना छँदैछन, त्यसमाथि बलात्कार, अपहरण र हत्याका घटना धेरै बढेका छन ।

दाइजो नल्याएको निहुँमा जिउँदै जलाउने, छोरी जन्माएको निहुँमा, श्रीमानद्वारा बहुविवाह गरी यातना दिने लगायत घरायसी समस्या अनि बोक्सीको नाउँमा महिलालाई थप प्रताडित गर्ने काम समाजका अगुवा भनाउँदाहरूबाट नै हुने गरेको पाइएको छ । यी सवै घटनाले अपराध मनोबृत्तिलाई बढावा दिईरहेका छन । मधेशमा दाइजो नल्याएको निहुँलाई आधार बनाएर महिलालाई जिउँदै÷जलाउने मार्ने जस्ता घटनाहरू त हरेक महिनाजसो सुन्नु परिरहेको छ ।

छोरी जन्माएको निहुँमा महिलालाई घर निकाला गर्नेदेखि लिएर अनेकौं यातना दिइन्छ तर आजको युगमा आएर यस्ता घटनाहरू दिन दहाडै घटिरहँदा पनि सम्बन्धित निकाय मौन रहनु बाहेक केही गर्न सकेको छैन् । दिनहँु भैरहेका हत्या र हिंसाका घटनाले आम मानिसलाई विक्षिप्त तुल्याएको अवस्था छ ।

चेतनाको कमीले पनि अनेकौँ  हिंसाका घटनाहरू बढेका छन । कु–संस्कार र धर्मको नाममा आडम्बर फैलाउने, प्रताडित गर्ने, निर्ममता प्रदर्शन गर्ने क्रम बढ्दै गर्दा यस्ता घटनामा संलग्नमाथि कडाभन्दा कडा कारबाही गर्नु जरुरी छ । दण्डहीनताको संस्कृतिले जरो गाड्दै गएको कारण नै जसले जे गरे पनि हुन्छ भन्ने मानसिकता बढेको अवस्था छ । तसर्थ अव प्रहरी प्रशासनले अपराधको विकसित घटनाक्रम नियन्त्रणमा ध्यान दिनु जरूरी छ ।

अपराधका नयाँ नयाँ तरिकाहरू समेत सार्वजनिक हुने गरेको छ । अतः प्रहरी प्रशासनले यी सवै घटनाक्रमलाई सुक्ष्म तरिकाले नियाल्दै शान्ति सुरक्षाको व्यवस्था गर्न ढिलाई नगरोस् । र, कञ्चनमा भएको इशान हत्याको घटनामा दोषी पत्ता लगाई कारवाही गर्ने बिषयमा ढिलाई नहोस् ।