खोज

काठमाडौं, १३ पुस ।

नेपालकै पहिलो र महँगो पुरस्कार राशी सहितका अन्तर्राष्ट्रिय रियालिटी शो ‘मेरो भ्वाइस यूनिभर्स’ र ‘मेरो डान्स यूनिभर्स’ को आयोजना हुने भएको छ ।

इन्ट्रा नेसनल वेलफेयर एण्ड सपोर्ट फाउन्डेसन अफ अमेरिकाले मंगलबार काठमाडौंमा एक कार्यक्रम आयोजना गर्दै नेपालकै पहिलो र महँगो पुरस्कार राशी सहितका अन्तर्राष्ट्रिय रियालिटी शो गायन–शो ‘मेरो भ्वाइस युनिभर्स’ र नृत्य–शो ‘मेरो डान्स युनिभर्स’ को घोषणा गरिएको हो ।

गायन–शो ‘‘मेरो भ्वाइस युनिभर्स’ का विजेताले एक करोड रूपैयाँ पुरस्कार पाउने छन्। जसमा फस्ट रनरअपले ३० लाख रूपैयाँ र सेकेन्ड रनर अपले २० लाख रूपैयाँ पुरस्कार पाउने छन् । शिव परियार, अन्जु पन्त, पुष्पन प्रधान, सुजता वर्मा, सुरेश अधिकारी र सुनिता थेगिम निर्णायक रहेको गायन–शो रिमा विश्वकर्मा र प्रजीत रानाले कार्यक्रम सञ्चालन गर्नेछन् ।

यस्तै नृत्य–शो ‘मेरो डान्स युनिभर्स’ का विजेताले पनि एक करोड रूपैयाँ पुरस्कार पाउने छन् । यो शोको फस्ट रनरअपले पनि ३० लाख र सेकेन्ड रनरअपले २० लाख पुरस्कार पाउने छन् । त्यस्तै मेरो डान्स यूनिभर्सको निर्णायकमा दीलिप रायमाझी, प्रियंका कार्की, शंकर विसी, केकी अधिकारी, निर्माण राई र मिथिला शर्मा रहनेछन् भने नरेश भट्टराई र सुनिता गुरुङले कार्यक्रम सञ्चालन गर्नेछन् ।

उक्त पुरस्कार राशी नेपालमै अहिलेसम्मकै ठूलो भएको आयोजकले दाबी गरेका छन्। शोमा विश्वभर छरिएर रहेका १६ वर्षमाथिका नेपाली भाषीहरूले रियालिटी शो मा सहभागिता जनाउन पाउने छन् । यो प्रतियोगितामा सहभागी हुन चाहने विश्वभरका नेपाली भाषीहरूले इन्ट्रा फाउन्डेसनको एप डाउनलोड गरेर फर्म भर्न सक्नेछन् । मंगलबारदेखि नै फारम भर्न सक्ने आयोजकले जानकारी दिए । यी दुवै सोको आवेदन दिने मिति जनवरीको अन्तिम तारिकमा तोकिएको छ । आयोजकका अनुसार नेपालको पूर्व, मध्य र पश्चिमाञ्चलबाट अडिसन हुनेछ । त्यस्तै म्यानमार, थाइल्याड, भुटान, भारत, अस्ट्रेलिया, अमेरिका, क्यानडा लगायत अन्य युरोपियन देशमा प्रतिस्पर्धीको संख्याका आधारमा अडिसन गरिनेछ। दुबै शोको निर्देशन एलेन श्रेष्ठले गर्नेछन् । रियालिटी–शो टेलिभिजनमा प्रसारण हुने छन् ।

इन्ट्रा नेशनल वेलफेयर एन्ड सपोर्ट फाउन्डेसन अफ अमेरिका संयुक्त राज्य अमेरिका र नेपालमा दर्ता भएको संस्था हो । यसले नेपाली संस्कृतिलेलाई विश्वभर प्रवर्द्धन गर्ने काम गर्दे आएको फाउण्डेसनका अध्यक्ष डिल्ली अधिकारीले जानकार िदिए । अधिकारीले संस्कृति जोगाउन सबै एकजुट हुनु पर्ने भन्दै संस्थाको मुख्य उद्देश्य नेपाली मनोरन्जन क्षेत्रमा सांगीतिक क्रान्ती ल्याउनु रहेको बताए । उनले भने ,‘यो शो रियालिटी शो मात्र नभएर कार्यक्रमको माध्यमबाट विश्वभर छरिएर रहेका नेपाली भाषीहरूलाई एक सूत्रमा बाँध्ने र उनीहरूलाई नेपाली भाषाको बारेमा सधैं नै सजग गराउने उद्देश्यले आयोजना गर्न लागिएको हो, ।’ उनले नेपाली कला र संस्कृतिलाई जोगाउन सबैले सहयोग गर्नुपर्ने बताए ।

कार्यक्रममा अभिनेता राजेश हमाल, दीलिप रायमाझी, संगीतकार रञ्जित गजमेर, अभिनेत्री मिथिला शर्मा, प्रियंका कार्की, केकी अधिकारी, गायक पुष्पन प्रधान, रीमा बिश्वकर्मा लगायतको उपस्थिति थियो।