खोज

गुल्मी, ०९ पुस । 

गुल्मीको क्षेत्र नं. १ अन्तर्गत रिडी–रुद्रवेणी–वामीटक्सार सडक खण्डमा निर्माणाधीन अवस्थामा रहेका चार वटा पक्की पुल बजेट अभावका कारण निर्माण कार्यले गति लिन सकेको छैन ।

काल गण्डकी करीडोर र मध्य पहाडी लोकमार्ग जोड्ने उक्त सडक जिल्लामा सबै भन्दा बढी सवारी साधन सञ्चालन हुने व्यस्त सडक मार्ग अन्तर्गत पर्दछ ।

२०३६ सालदेखि निरन्तर रूपमा सञ्चालनमा आएको उक्त सडक खण्डको डहरे खोला, नादेवा खोला, भार्से खोला र गिदी खोलामा पक्की पुल निर्माणको काम भइरहेको छ । उक्त सडकहुँदै बाग्लुङ् र पर्वतसम्म पुग्ने नागरिकहरूले बर्सादको समयमा पुल नहुँदा ठुलो सास्ती व्यहोर्दै आउनुपर्ने बाध्यता थियो ।

गुल्मीको रुद्रवेणीदेखि वामीटक्सार सडक खण्ड अन्तर्गत चार वटा खोलाहरूमा पक्की पुल निर्माण कार्यले तीव्रता पाउँदा त्यस क्षेत्रका नागरिकहरूमा अब चाँडै पुल बन्ने आशा पलाएको थियो ।

सडक डिभिजन पाल्पा अन्तर्गत निर्माण हुन थालेका त्यस क्षेत्रका चार पक्की पुल निर्माणको काम राजेश्वरी–लुम्बिनी जेभीले गरिरहेको छ ।

निर्माण कम्पनीले भ्याट सहित २२ करोड ३१ लाख ६० हजार २१० रुपैयाँको लागतमा उक्त चार वटा पुल निर्माण गर्न थालेको सडक डिभिजन पाल्पाका सूचना अधिकारी इन्जिनियर दुर्गा गौतमले जानकारी दिए ।

गौतमका अनुसार डहरे खोलामा ४० मिटर, नादेवा खोलामा २० मिटर, भार्से खोलामा ४० मिटर र गिदी खोलामा २० मिटर गरी कुल १२० मिटर लम्बाइको पुल निर्माणको काम भइरहेको छ ।

२०८० जेठ २२ गते सम्झौता भएको उक्त पुल २०८२ साउन २२ गते सम्पन्न गर्नुपर्ने सम्झौता गरिएको छ । पुल निर्माणको हालसम्म ७५ प्रतिशत भौतिक र ६० प्रतिशत वित्तीय प्रगति भएको भैसकेको कार्यालयले जनाएको छ ।

डहरे खोलामा निर्माण भएको पुलको फाउन्डेसन र सव–स्ट्रक्चरको काम सम्पन्न हुनुका साथै सुपर–स्ट्रक्चरको ४० मिटर ढलानको काम सम्पन्न भैसकेको छ । नादेवा खोलामा पनि पुलको फाउन्डेसन र सव–स्ट्रक्चरको सम्पूर्ण काम सकिएको छ भने सुपर–स्ट्रक्चरको ढलान र पहुँच सडकको काम बाँकी रहेको बताइएको छ ।

त्यसैगरी भार्से खोलामा निर्माण भएको पुलको फाउन्डेसन सब–स्ट्रक्चरको काम सकिनुका साथै सुपर–स्ट्रक्चरको ४० मिटर ढलान गरिसकिएको छ । पहुँच सडकको काम भने बाँकी रहेको छ । गिदी खोलामा निर्माण भएको पुलको फाउन्डेसन र सव–स्ट्रक्चरको काम सकिएपछि ढलान गर्ने तयारी भइरहेको राजेश्वरी–लुम्बिनी जेभीका सञ्चालक भागवत गिरीले जानकारी दिएका छन् ।

गिदी खोला बाहेक तीन वटा पुलको काम अन्तिम चरणमा पुगेको र हालसम्म निर्माण व्यवसायीको तर्फबाट ९० प्रतिशत काम सम्पन्न भैसकेको निर्माण व्यवसायी भागवत गिरीले बताए ।

गिदी खोलाको पुलको भने ४० प्रतिशत मात्र काम सम्पन्न भएको छ । पुलको शीर्षकमा यस वर्ष ६ करोड रुपैयाँ विनियोजित भएकोमा उक्त रकमबाट गत वर्षको दायित्व भुक्तानी भैसकेको बताइएको छ ।

निर्माण व्यवसायीले हालसम्म निर्माण सम्पन्न गरेबापत रनिङ् बिलको पाँच करोड रुपैयाँ भुक्तानी पाउन बाँकी रहेको बताइएको छ । “निर्माणको लागि थप रकम रकमान्तर भइ आउने हो वा हैन भन्ने विषयमा अन्यौलता छ, त्यसै कारण काम अघि बढाउनेकी नबढाउने भन्ने विषय अन्योलमा पैदा भएको छ,” निर्माण व्यवसायी भागवत गिरीले भने ।

उक्त क्षेत्रमा पुल निर्माणको लागि पहल गर्दै आएका गुल्मी क्षेत्र नं १ का सांसद चन्द्र भण्डारीले पुल निर्माणको काममा रकमको अभाव हुन नदिने भन्दै तोकिएकै समयमा काम सम्पन्न होस भनेर आफू लागि परेको बताउँदै आएका छन् ।