खोज

लमही,२७ मंसिर ।

दाङ  नेपाली काँग्रेसका सहमहामन्त्री किशोर सिंह राठौरले पार्टीको पन्ध्रौँ महाधिवेशनमा लाग्न नेता कार्यकर्तालाई निर्देशन दिएका छन् ।

नेपाली काँग्रेस लुम्बिनी प्रदेश संस्थापन पक्षले  शुक्रवार लमहीमा आयोजना गरेको प्रदेश स्तरीय कार्यक्रमलाई सम्बोधन गर्दै सहमहामन्त्री राठौरले वडादेखि केन्द्र सम्म सर्वसम्मत रूपमा प्रतिनिधि छनौट हुने गरेर महाधिवेशनको तयारीमा लाग्न आग्रह गरेका छन् ।

कार्यक्रमलाई सम्बोधन गर्दै सहमहामन्त्री राठौरले जेनजी आन्दोलनका नाममा भएका गतिविधिलाई लिएर पार्टीभित्र केही व्यक्तिहरूले विभाजनतर्फ लैजाने षडयन्त्र गरेको आरोप लगाएका छन् । उनले आन्दोलनका क्रममा अराजक समूहबाट काँग्रेस सभापति शेरबहादुर देउवामाथि भएको आक्रमणप्रति सहानुभूति नदेखाई उल्टै हस्ताक्षर सङ्कलन गर्दै देश दौडाहा गर्नु गलत सङ्केत भएको बताए ।

राठौरका अनुसार नेताले कार्यकर्तालाई न्याय दिन नसके कार्यकर्ताको भरोसा र मनोबल दुवै गुम्ने भएकाले नेतृत्वले कार्यकर्ताप्रति माया र जिम्मेवारी बोध राख्न आवश्यक छ । पार्टीले प्रभावकारी प्रशिक्षण नदिनु पनि कार्यकर्तामा नकारात्मक सोच बढ्नुका कारण भएको उनको भनाइ थियो ।

“बुढापाकाले धानेको पार्टी हो, गुट उपगुट हिजो पनि थियो, आज पनि छ, भोलि पनि रहनेछ,” राठौरले भने, “तर गुटको नाममा विभाजनको भूमिका खेल्नु अस्वीकार्य छ ।” उनले जेनजीको नाममा पार्टीभित्र विवाद सिर्जना गर्नु गैर जिम्मेवार कदम भएको बताए ।

राणा शासन र पञ्चायत दुवै हटाउन सफल भएको काँग्रेसलाई विचलित हुनुपर्ने कुनै कारण नरहेको उल्लेख गर्दै राठौरले भने, “राजनीतिमा व्यक्तिले होइन, विचार र इमानदारीले नेतृत्वको पहिचान तय गर्छ।” काँग्रेसले शान्ति र विकासका काम गरे पनि सुशासन र भ्रष्टाचार नियन्त्रणमा कमजोरी रहेको कुरालाई पार्टीले आत्मसात् गर्नुपर्ने उनको धारणा थियो ।

यसैबिच, काँग्रेसका केन्द्रीय सदस्य बालकृष्ण खाँडले भदौ २३ र २४ गतेको जनजी आन्दोलनका नाममा अराजक समूहले नेपालमा घुसपैठ गरेको दाबी गरे। भू–राजनीतिक असन्तुलन बुझ्न नसक्दा देश अस्थिर विद्रोहको सिकार बन्न पुगेको उनले बताए ।

उनका अनुसार गठबन्धन सरकारको नेतृत्वमा रहेका बेला आन्दोलन सुरु हुँदा काँग्रेसलाई गठबन्धन बचाउने दायित्व थियो । “गठबन्धन नतोड्नु अपराध हो र ?” भन्दै उनले काङ्ग्रेसजस्तो लोकतान्त्रिक पार्टीले अराजक क्रियाकलापको समर्थन कहिल्यै नगर्ने बताए ।

लमहीमा सम्पन्न संस्थापन (देउवा) पक्षको भेला आगामी पन्ध्रौँ महाधिवेशन र फागुन २१ गते हुने प्रतिनिधि सभा निर्वाचनमा पार्टीले अपनाउने रणनीतिसम्बन्धी छलफलमुखी भएको थियो ।