खोज

रोल्पा, १५ मङ्सिर ।

रोल्पा सदरमुकाम लिवाङमा विप्लव नेतृत्वको नेकपा माओवादीले भत्किएका सडक मर्मत गरेको छ ।

नेकपा माओवादी रोल्पा नगर समितिको आयोजनामा भत्किएका सडक मर्मत गरिएको हो । पार्टीका नेता कार्यकर्ता र सर्वसाधारणले सदरमुकाम स्थित रोल्पा नगरपालिका वडा नं. २ र ४ मा भत्किएका सडक मर्मत गरेका हुन ।

सो पार्टीले गरिरहेको सडक मर्मत कार्यलाई नेपाली काँग्रेसका नेता समेत रहेका पूर्व सांसद लेखनाथ आचार्यले समेत साथ दिएका थिए । असल काम जसले गरे पनि साथ दिनु पर्छ पूर्व सांसद आचार्यले भने ।

नगरपालिकाले आँखा अगाडि भत्किएका यस्ता संरचना नदेख्नु दुखद भएको सांसद आचार्यको भनाइ छ । बिग्रे भत्केका यस्ता संरचना निर्माण गर्ने काम नगरपालिकाको नियमित काम भए पनि त्यतातिर ध्यान नजानु दुखद भएको आचार्यको भनाइ छ ।

रोल्पाको मुटु जिल्ला सदरमुकाममा नै लामो समयदेखि भत्किएका संरचना बनाउन सम्बन्धित निकाय तयार नभएपछि आफूहरूले सो काम गरेको नेकपा माओवादीका नगर इन्चार्ज दलबहादुर खत्रीले भने ।

सडक मर्मत नहुँदा दुर्घटनाको समेत सम्भावना बढ्दै गएपछि जिम्मेवार पार्टीको नाताले हामीले मर्मत सम्भार गरेका हौ खत्रीले भने ।

यही मङ्सिर १८ र १९ गते राष्ट्रिय बाल साहित्य सम्मेलन समेत रोल्पा सदरमुकाम लिवाङमा हुँदैछ । देश विदेशबाट करिब १ सयको सङ्ख्यामा रोल्पा आउने भएकाले भत्किएका सडकहरू देखेर राम्रो सन्देश पनि नजाने हुँदा पार्टीले यस्तो काम गर्न बाध्य भएको साहित्यकार भूपबहादुर केसीको भनाइ छ ।

आफूहरूले गरेको कामलाई अन्य व्यक्तिहरूले पनि सहयोग गर्नु भयो युवा सङ्गठन नेपालका केन्द्रीय संयोजक विश्लेषण सी ले भने ।

अन्य दलका नेता कार्यकर्ता, बजार बासी समुदाय र ट्राफिक प्रहरीले समेत सो कार्यमा सहयोग गरेको संयोजक विश्लेषणको भनाइ छ ।

श्रममा संलग्न व्यक्तिहरूलाई युवा व्यवसायी रमेश आचार्यले एक छाक खानाको व्यवस्था समेत गरेको विश्लेषण सिको भनाइ छ ।