खोज

दाङ,५ मङ्सिर ।

लैङ्गिकता आधारित हिंसा कम गर्नका लागि डिजिटल साक्षरतामा जोड दिनुपर्ने बताएका छन् ।

नेपाल परिवार नियोजन सङ्घ दाङ शाखा र संयुक्त राष्ट्रसङ्घीय जनसङ्ख्या कोषको संयुक्त आयोजनामा कार्यक्रम भएको बृहत् यौनिकता लैङ्गिकता आधारित हिंसासम्बन्धी  शिक्षा तथा प्रविधि–सहज कार्यक्रमका सहभागीले प्रविधिलाई सदुपयोग गर्नुपर्ने बताएका छन् ।

जिल्ला जनस्वास्थ्य कार्यालय दाङका निमित्त प्रमुख मेघराज आचार्यले युवाहरूका बिचमा  यौनिकता शिक्षालाई बृहत् रूपमा लैजानु पर्ने बताए ।

लागू औषधको सेवन देखि प्रविधिको प्रयोगसम्मका कुरामा उनिलाई ज्ञान दिनुपर्ने बताए । सही समयमा सही शिक्षा दिए मात्रै समाज सही दिशामा जान्छ ।

कार्यक्रममा नेपाल परिवार नियोजन सङ्घ दाङका प्रबन्ध निर्देशक वसन्त खनालले  डिजिटल युगमा बढ्दो अनलाइन हिंसा, साइबर जोखिम र सुरक्षित डिजिटल व्यवहारको आवश्यकताबारे  जानकारी गराएका थिए  ।

युवालाई प्रविधिमा सहजता , लैङ्गिकता आधारित हिंसाका प्रकार, अनलाइन दुर्व्यवहार, फेक पहिचान, ब्ल्याक मेल जस्ता जोखिम तथा तिनको रोकथामका उपायबारेमा जानकारी गराएका थिए  ।

सहमतिबिना कुनै पनि व्यवहार स्वीकार्य नहुने, व्यक्तिगत सिमाना, सम्मानजनक व्यवहार, सुरक्षित सम्बन्ध निर्माण तथा समान अवसर र समान अधिकारका विषयमा युवालाई झनै सचेत बनाउने उद्देश्यका विषयमा छलफल भएको थियो ।

मनोवैज्ञानिक तथा भावनात्मक स्वास्थ्यका सन्दर्भमा तनाव व्यवस्थापन, दबाब सामना गर्ने तरिका, भावनात्मक नियन्त्रण तथा सकारात्मक सोच विकास गर्ने विधिहरूका बारेमा जानकारी गराएका थिए  ।

सरकारी तथ्याङ्क अनुसार आर्थिक वर्ष २०७८/०७९ मा नेपालभर दश हजार सात सय ३९ वटा साइबर अपराधका मुद्दा दर्ता भएका छन् । जसमा ४४ प्रतिशत बढी  महिला तथा किशोरी पीडित  रहेका थिए ।

लुम्बिनी प्रदेशमा मात्रै पाँच सय बढी मुद्दा दर्ता भएको र एक हजार दुई सय ८२ आत्महत्याका घटनामध्ये धेरैलाई डिजिटल हैरानी तथा अनलाइन धम्कीले प्रत्यक्ष वा परोक्ष प्रभाव पारेको देखिएको छ ।

नेपाल परिवार नियोजन सङ्घ दाङ शाखाका प्रबन्ध निर्देशक  खनालले युवाबिच यौनिकता शिक्षाको अभावकै कारण दुर्बेशन, कम उमेरमा विवाह, यौनजन्य सङ्क्रमण, मानव बेचबिखन, लागू औषध दुरुपयोग तथा लैङ्गिक हिंसा बढिरहेको बताए ।

पद्मोदय पब्लिक माध्यमिक विद्यालयका शिक्षक भरतमणि पोखरेलले डिजिटल वातावरणमा अझ जिम्मेवार, सचेत र आत्मविश्वासी बनेको अनुभव सुनाएका थिए । परिवर्तन आफूबाट गर्नुपर्ने बताएका थिए ।

परिवार नियोजन सङ्घ  दाङका  कोषाध्यक्ष माया पोखरेल लगायतले युवा पुस्तालाई सही बाटोमा ल्याउनका लागि सबैले हातेमालो गर्नुपर्ने बताएका  थिए ।