खोज

नेपाल प्रिमियर लिग (एनपीएल) को दोस्रो संस्करण मङ्सिर १ गतेदेखि सुरु भएको छ ।

नेपालमा आयोजना भएका व्यावसायिक खेलकुद प्रतियोगितामध्ये सबैभन्दा ठुलो मानिएको नेपाल प्रिमियर लिग (एनपिएल) क्रिकेट प्रतियोगिताको दोस्रो संस्करणमा विश्वकै क्रिकेट प्रेमीहरूको ध्यान नेपालतर्फ आकर्षित भएको छ ।

क्रिकेटमार्फत नेपाललाई विश्वमाझ चिनाउने यो ठुलो अवसर हो । फ्रेन्चाइज प्रतियोगिताका रूपमा व्यावसायिक प्रतिष्ठानहरूका साथै निजी क्षेत्रबाट करोडौँ लगानी गरिएको एनपिएल क्रिकेटको पहिलो संस्करणको सफलतापछि हिमालय महोत्सवका रूपमा दोस्रो प्रतियोगिताको सुरुवातले नेपाललाई क्रिकेटमय मात्रै बनाएको छैन, नेपालले क्रिकेटबाट ठुलो सफलता हासिल गर्छ भन्ने आम विश्वास सिर्जना भएको छ ।

यही मङ्सिर २७ गतेसम्म सञ्चालन हुने २४ दिनको उक्त प्रतियोगिताको उद्घाटन खेलको सबै टिकट तत्कालै बिक्री हुनु एनपिएल क्रिकेटप्रति अत्यधिक दर्शकको अपार मोह हो भन्दा अत्युक्ति हुँदैन ।

एनपीएलको दोस्रो संस्करणको विशेषता भनेको खेलाडीहरूले पहिलो पटक फ्लडलाईटमा खेल्न पाएका छन् । यद्यपि पहिलो पटक भएकोले खेलाडीहरूलाई थोरै असहज भने महसुस भएको छ । काठमाण्डौंमा यति बेला चिसो छ ।

खेलाडीहरू चिसोका कारण पनि खेलमा असहजता महसुस गरिरहेका छन् । अबको एनपीएलमा मौसम हेरेर पनि खेल आयोजना गर्नुपर्ने अवस्था अहिलेको अनुभवले देखाएको छ । जेहोस दोस्रो संस्करणको एनपीएलले पहिलो संस्करणमा जस्तै नेपालको पर्यटन बजारलाई विश्वमाझ प्रवद्र्धन गर्न सहयोग पुग्ने ठानिएको छ । विदेश खेलाडीको सहभागिताले पनि एनपीएलमा रौनकता थपेको छ ।

काठमाण्डौंको त्रिभुवन विश्वविद्यालय क्रिकेट मैदानमा भैरहेको एनपिएलको दोस्रो संंस्करणमा पनि पहिलेको जस्तै खेलाडीमा मात्र होइन खेलप्रेमीमा समेत उत्साह सिर्जना गरेको छ । वास्तवमा अन्तर्राष्ट्रिय हैसियतको यो खेलकुदले नेपालको गौरव बढाएको छ ।

नेपालमा अन्तर्राष्ट्रिय स्तरका खेल आयोजना गर्न नसकिएपनि कम्तीमा पनि पहिलो र दोस्रो संस्करणको एनपिएलमा सहभागी चर्चित र नाम चलेका विदेशी खेलाडीको सहभागीताले नेपालमा खेलकुदको रौनक बढाएको छ । साँचो अर्थमा भन्दा नेपाल खेलकुदमय बनेको छ ।

नेपालमा राष्ट्रियमात्र होइन अन्तर्राष्ट्रिय स्तरकै खेलाडी पनि आउँछन र नेपालको नाम विदेशमा फैलाउन समेत सहयोग पुग्छ भन्ने यो प्रमाण पनि हो । नेपालमा क्रिकेटको भविष्य र संभावना छ भन्ने कुरा नेपालका खेलाडीले विश्व इतिहास कायम गरेको रेकर्ड आफै काफी छन् ।

खेल क्षेत्रमा अवसर पाउने हो भने राष्ट्रिय उत्साह सिर्जना गर्न सक्छन भन्ने नेपाली खेलाडी उदाहरण बनेका छन् । खेलाडीहरू नेपालमा अवसर नभएकै कारण विदेश पलायन हुन बाध्य भैरहेको बेला कम्तीमा पनि काठमाण्डौंमा भैरहेको एनिपएलले खेलाडीहरूको भविष्यको ढोका खोलेको छ ।

खेल त्यस्तो माध्यम हो– जसले नेपालको पहिचान अन्तर्राष्ट्रिय जगतमा फैलाउन सहयोग पुग्छ । खेल र खेलाडीले राष्ट्रकै प्रतिनिधित्व गरेका हुन्छन् । मैदानमा खेलाडीले गर्ने प्रदर्शन र देखाउने व्यवहारसँग देशको प्रतिष्ठा र चिनारी गाँसिएको हुन्छ ।

त्यसैले खेलाडीलाई सम्बन्धित राष्ट्रको सद्भावना दूतका रूपमा हेरिएको हुन्छ । दोस्रो संस्करणको एनपिएलले राष्ट्रको गौरव बढाउने निश्चित छ । एनपिएलका माध्यमबाट नेपालमा खेलको लहर सिर्जना हुनेछ ।

यद्यपि नेपालमा अहिले पनि खेलकुद विकासमा भौतिक पूर्वाधारको ठुलो अभाव छ । पर्याप्त बजेट अभावमा गतिला खेल स्थल निर्माण हुन सकेका छैनन् । भएका पूर्वाधार मर्मत अभावमा जीर्ण बन्दै गएका छन् ।

बल्लबल्ल त्रिवि क्रिकेट मैदानमा फ्लड लाईट जडान भएकोले नेपालको इज्जत जोगिएको छ । अबको दिनमा सरकारले नेपाली खेलाडीलाई स्वदेशमै वस्नसक्ने वातावरण सिर्जना गरोस् । एनपिएलले नेपालमा खेलको वातावरण सिर्जना गर्न सहयोग पु¥याउने विश्वास गरिएको छ ।

जेहोस एनपिएलको दोस्रो संस्करणको महाकुम्भले नेपालको खेल जीवनलाई गति प्रदान गर्ने निश्चित छ । एनपिएलले नेपाली खेलाडीहरूमा आत्मबल बढाउन सहयोग पुग्नेछ । तसर्थ एनपिएललाई सफल बनाउन सरकारसँगै हरेक नेपाली खेल प्रेमीको कर्तव्य हो ।