खोज

चन्द्रौटा (कपिलवस्तु), ७ पुस ।

कपिलवस्तु शिवराज नगरपालिका वडा नम्बर १ मा एक दम्पतीले मृतक आफन्तको स्मृतिमा विद्यार्थीलाई न्यानो स्वीटर वितरण गरेका छन् । चन्द्रौटा बजार अवस्थित विकास टेलर्सका सञ्चालक दम्पती विष्णु कँडेल र गीता घिमिरे कँडेलले मृतक आफन्तको स्मृतिमा विद्यार्थीलाई स्वीटर (कपडा) वितरण गरेका हुन् ।

सञ्चालक दम्पतीको स्वर्गीय सासुससुरा रुन्नता घिमिरे, दधिराम घिमिरे, दाजु शंकर कँडेल र जेठान तुलसीराम घिमिरेको स्मृतिमा शिवपुर अवस्थित सरस्वती आधारभूत विद्यालयमा अध्यनरत २७ जना बालबालिकालाई न्यानो स्वीटर वितरण गरिएको विद्यालयले जनाएको छ ।

विभिन्न बहानामा गरिने अनावश्यक फजुल खर्च गर्नुभन्दा विपन्नलाई चिसोमा राहत मिल्ने हेतुले स्वीटर वितरण गरिएको सञ्चालक कँडेलले बताए । जताततै आर्थिक संकट भएको अवस्थामा चिसोले कसैले ज्यान गुमाउन नपरोस भन्ने उनको भनाइ छ ।

विद्यालयमा अध्ययनरत विपन्न परिवारका विद्यार्थीलाई न्यानो कपडा वितरण बिहीबार वितरण गरिएको विद्यालयका प्रधानाध्यापक सीताराम चौधरीले जानकारी दिए ।

विद्यालय व्यवस्थापन समितिका अध्यक्ष छन्द बहादुर सिंह जिसीले वितरण गर्न आफ्नो विद्यालयलाई छनौट गरेको प्रति धन्यवाद व्यक्त गरे । आगामी दिनमा समेत यसरी नै सहयोग र सहकार्य गर्न समेत उनले अनुरोध गरे ।