खोज

बुटवल, २६ कात्तिक ।

नेपाल विद्युत प्राधिकरण, लुम्बिनी प्रादेशिक कार्यालय बुटवलले आम उपभोक्तामा विद्युतीय सुरक्षा र चुहावट नियन्त्रणबारे जनचेतना अभिवृद्धि गर्ने उद्देश्यले प्रदेशव्यापी सचेतना अभियान सञ्चालन गर्ने भएको छ।

आगामी मंसिर ७ गतेदेखि सुरु हुने उक्त सप्ताहव्यापी विद्युतीय सुरक्षा सचेतना कार्यक्रम लुम्बिनी प्रदेशका सबै २१ वितरण केन्द्रमार्फत सञ्चालन गरिनेछ। कार्यक्रम अन्तर्गत प्रदेशभरका विद्यालयहरूमा अध्ययनरत धेरैभन्दा धेरै विद्यार्थीहरूलाई लक्षित गरी विद्युतीय दुर्घटना न्युनिकरण, सुरक्षित उपयोगका उपाय र ऊर्जा चुहावट नियन्त्रण सम्बन्धी व्यवहारिक जानकारी दिइनेछ।

नेपाल विद्युत प्राधिकरणले यो अभियानलाई सामाजिक उत्तरदायित्वअन्तर्गत सञ्चालन गर्न लागेको जनाएको छ। प्रादेशिक कार्यालयका प्रमुख इन्जिनियर हरि प्रसाद पाण्डेका अनुसार पहिलो चरणमा विद्यालयका विद्यार्थीहरूका माध्यमबाट आम नागरिकसम्म सचेतना फैलाउने योजना बनाइएको हो।

कार्यक्रम निःशुल्क रूपमा सञ्चालन गरिने भएकोले इच्छुक विद्यालयहरूलाई आफ्ना सम्बन्धित वितरण केन्द्रमा सम्पर्क गर्न आग्रह गरिएको छ। साथै, थप जानकारीका लागि कार्यक्रम संयोजक इन्जिनियर राम प्रसाद ज्ञवाली (९८५११३२८५३) सँग सम्पर्क गर्न सकिने जनाइएको छ।

यस अभियानले विद्यालय स्तरदेखि नै विद्युतीय सुरक्षा र ऊर्जा संरक्षणप्रति जिम्मेवार सोच विकास गर्न मद्दत गर्ने अपेक्षा गरिएको छ।