खोज

काठमान्डौ, २१ कार्तिक ।

अन्तर्राष्ट्रिय क्रिकेट परिषद (आइसिसी) ले सन् २०२६ मा भारत र श्रीलंकामा हुने आइसिसी पुरुष टी–२० विश्वकपका लागि आयोजक शहर तोकेको छ ।

भारतमा हुने खेलहरू अहमदाबाद, दिल्ली, कोलकाता, चेन्नई र मुम्बईमा आयोजना हुनेछन् । यस्तै, श्रीलंकाको कोलम्बो र क्यान्डीका रंगशालाहरूमा पनि विश्वकपका खेलहरू खेलिने आइसिसीले जनाएको छ ।

टी–२० विश्वकप फेब्रुअरी ७ (माघ २४)  मा सुरु भई मार्च ८ (फागुन २४)  मा अहमदाबादमा हुने फाइनल खेलसँगै सम्पन्न हुनेछ । तर, पाकिस्तान फाइनलमा पुगेमा उक्त खेल श्रीलंकामा हुने सहमति भएको छ ।

त्यही अवधिमा नेपालमा दशौं राष्ट्रिय खेलकुद प्रतियोगिता पनि हुने तय छ । राष्ट्रिय खेलकुद परिषदको बोर्ड बैठकले फागुन १ देखि ७ गतेसम्म प्रतियोगिता सञ्चालन गर्ने निर्णय गरेको थियो । नेपालले यसपटक तेस्रो पटक टी–२० विश्वकपमा सहभागी हुने भएकाले विश्वकपप्रति नेपाली दर्शकको चासो बढ्ने निश्चित देखिन्छ । तर, सोही समयमा राष्ट्रिय खेलकुद आयोजना हुने भएकाले खेलकुदको सबैभन्दा ठूलो राष्ट्रिय प्रतिस्पर्धा छायाँमा पर्न सक्ने चिन्ता पनि व्यक्त गरिएको छ । राष्ट्रिय खेलकुदमा क्रिकेट समेत समावेश भएकाले राष्ट्रिय टोलीका खेलाडीहरूले निर्धारित समयमा खेल्न नपाउने सम्भावना छ ।

कर्णाली प्रदेशमा आयोजना हुने भनिएको दशौं राष्ट्रिय खेलकुद गत वर्ष तय भए पनि पटक–पटक स्थगित हुँदै आएको छ ।

आइसिसीले विश्वकपको खेल तालिका आगामी हप्तामा सार्वजनिक गर्ने तयारी गरेको छ । प्रतियोगिता सुरु हुन करिब तीन महिना बाँकी रहँदा सहभागी राष्ट्रहरूले समूह विभाजन र खेल तालिकाको प्रतीक्षा गरिरहेका छन् । आइसिसीले अहिलेसम्म टिकट बिक्रीसम्बन्धी जानकारी भने सार्वजनिक गरेको छैन ।

भारत र पाकिस्तानबीचको समझदारी अनुसार पाकिस्तानले आफ्ना सबै खेल श्रीलंकामा खेल्नेछ । दुबै देशबीच भएको सहमतिअनुसार बहुराष्ट्रिय प्रतियोगिताहरू तटस्थ स्थानमा खेलाइने व्यवस्था गरिएको छ । त्यसैले पाकिस्तान फाइनलमा पुगेमा फाइनल श्रीलंकामै हुनेछ ।

सन् २०२६ को टी–२० विश्वकपको ढाँचा अघिल्लो संस्करणजस्तै रहनेछ । २० टोलीलाई पाँच–पाँचको चार समूहमा विभाजन गरिनेछ । प्रत्येक टोलीले समूहका अन्य चार टोलीसँग एक–एक खेल खेल्नेछ । प्रत्येक समूहका शीर्ष दुई टोली सुपर–एट चरणमा पुग्नेछन् ।

सुपर–एटमा रहेका टोलीहरू फेरि चार–चारको दुई समूहमा विभाजन हुनेछन् । त्यहाँबाट शीर्ष दुई टोली सेमिफाइनलमा पुग्ने र त्यसका विजेताहरूले फाइनलमा उपाधिका लागि प्रतिस्पर्धा गर्नेछन् ।

आयोजक भारत र श्रीलंका बाहेक २०२४ को टी–२० विश्वकपका शीर्ष सात टोली — अफगानिस्तान, अष्ट्रेलिया, बङ्गलादेश, इङ्ल्यान्ड, दक्षिण अफ्रिका, संयुक्त राज्य अमेरिका र वेस्ट इन्डिजले पनि स्वचालित रूपमा स्थान पाएका छन् ।

टी–२० वरीयताका आधारमा न्यूजिल्यान्ड, पाकिस्तान र आयरल्याण्ड पनि छनोट भएका छन् । क्यानाडाले अमेरिकी क्वालिफायरमार्फत स्थान बनाएको हो भने इटाली र नेदरल्याण्ड्सले युरोप क्षेत्रीय प्रतियोगिताबाट पहिलो पटक टी–२० विश्वकपको टिकट पक्का गरेका छन् । नामिबिया र जिम्बाब्वे अफ्रिका क्वालिफायरका शीर्ष दुई बनेका थिए । नेपाल, ओमान र युएईले एशिया–ईएपी क्वालिफायरमार्फत सहभागिता सुनिश्चित गरेका छन् ।

भारत टी–२० विश्वकपको हालको डिफेन्डिङ च्याम्पियन हो । भारतले सन् २०२४ को फाइनलमा बार्बाडोसमा दक्षिण अफ्रिकालाई हराउँदै उपाधि जितेको थियो ।