खोज

काठमाडौ, १९ कार्तिक ।

पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेले नख्खु कारागारबाट बाहिर निस्कँदा सार्वजनिक भएको पत्रबारे आफूलाई कुनै जानकारी नभएको बताएका छन् ।

जेनजी आन्दोलनका क्रममा भएको दमनबारे छानबिन गर्न गठन गरिएको उच्चस्तरीय जाँचबुझ आयोगमा उपस्थित भएका लामिछानेले कारागारकै सुरक्षाकर्मी र कर्मचारीहरूले आफूलाई रास्वपाका कार्यकर्ताको जिम्मा लगाएर पठाएको बताए ।

उनले बयानका क्रममा भने, “कारागार प्रशासनले नै मलाई परिवार र रास्वपाका नेताहरूको जिम्मा लगाएर छाडेको हो । म निस्कँदा जेलरलाई भेटेको पनि थिइनँ । पत्रबारे जानकारी भने पछि मात्रै पाएँ ।”

स्रोतका अनुसार लामिछानेले आयोगलाई दिएको बयानमा कारागार प्रशासनबाट नै सबै प्रक्रिया भएको उल्लेख गरेका छन् ।

यसअघि आयोगले नख्खु कारागारका जेलरसँग पनि सोधपुछ गरेको थियो । सो क्रममा जेलरले ‘आदेश आएपछि पत्र तयार गरिएको’ बताएको आयोग स्रोतले जनाएको छ । तर, उनले आदेश कसबाट आएको हो भन्ने विवरण भने खुलाएका थिएनन् ।

जेनजी आन्दोलनको भोलिपल्ट रास्वपाका नेता तथा कार्यकर्ताहरू नख्खु कारागार पुगेका थिए र त्यहाँ रहेका सभापति रवि लामिछानेलाई बाहिर ल्याएका थिए । त्यसक्रममा जेलरले तयार पारेको भनिएको पत्र सार्वजनिक भएपछि उक्त घटनाको वैधानिकता र प्रक्रिया दुवैबारे प्रश्न उठेका थिए ।