खोज

सल्यान, १९ कार्तिक ।

सल्यानको शारदा नगरपालिका, १२ रेशमज्युलामा श्रीमद् भागवत सप्ताह ज्ञान विज्ञान महायज्ञ आयोजना गरिएको छ ।

श्रीकृष्ण मन्दिर प्राङ्गणमा सोमबार यज्ञमण्डप स्थापना गरेर शान्ती कलश यात्रासहित उद्घाटन भएको महायज्ञमा मङ्गलवारदेखि सङ्गीतमय कथा वाचनसहित नियमित धार्मिक कार्य सुरु भएका छन् ।

श्रीमद भागवत सप्ताह ज्ञान विज्ञान महायज्ञ शृङ्गारिक महाआरती धनधन्याञ्चल पितृ मोक्ष तथा शालिग्राम पूजा आर्चना २०८२ आगामी कार्तिक २४ गतेसम्म सञ्चालन हुने मूल आयोजक समितिका संयोजक सुरेन्द्र बुढाले जानकारी दिए ।

श्रीकृष्ण मन्दिर, भोटेकालिका मन्दिर, बिश्वकर्मा मन्दिरको भौतिक संरचना विकास एवं शिव माध्यमिक विद्यालय, महेन्द्रदय विद्यालय र दुर्गा आधारभूत विद्यालयमा अक्षयकोष स्थापनाको उद्देश्यले महायज्ञ आयोजना गरिएको हो ।

साथै धार्मिक, सांस्कृतिक र सामाजिक एकता र संस्कार जगेर्नाका लागि रेशमज्युलामा पहिलो पटक महायज्ञ आयोजना गरिएको महायज्ञ व्यवस्थापक तिलकराम शर्माले बताए । कर्णाली प्रदेश सरकारका उद्योग, पर्यटन, वन तथा वातावरण मन्त्री सुरेश अधिकारीले सोमबार महायज्ञको औपचारिक उद्घाटन गरेका थिए ।

प्रमुख कथा वाचक प्रसिद्ध युवा पण्डित इश्वर रेग्मीले भागवतका कथाहरूबाट ज्ञान र विज्ञानको संयोजनबारे प्रवचन दिइरहेका छन् । साथै राष्ट्रिय स्तरका धार्मिक कलाकार पोषण श्रेष्ठ लगायतले भजन, कृतन र झाँकी प्रस्तुत गरिरहेका छन् ।

महायज्ञमा बिहान ६ देखि ८ बजेसम्म नित्य पूजा पाठपारायण, ८ बजेदेखि ११:३० बजेसम्म श्रीमद भागवत सप्ताह पाठपारायण तथा शालिग्राम पूजा, मध्याह्न १२ बजेदेखि दिउँसो ४ बजेसम्म सङ्गीतमय कथा प्रवचन, भजनकृतन, झाँकी प्रस्तुति,  साँझ ७ बजे शृङ्गारिक महाआरती र ७:३० देखि राती १० बजेसम्म रात्रिकालीन कथा प्रवचन, भजनकृतन, झाँकी प्रस्तुतिका कार्यक्रम रहेको आयोजकले जनाएको छ ।