खोज

बर्दिया, १८ कात्तिक ।

खाद्य व्यवस्था तथा व्यापार कम्पनी लिमिटेडले यस वर्षको धान खरिद कार्यक्रम आजदेखि राजापुरमा सुरु गरेको छ । कम्पनीका प्रमुख कमल राज पाण्डेले किसान प्रतिनिधिसँगको छलफलमा सबै तयारी पूरा भइसकेको र केन्द्रबाट शुक्रबार मात्र खरिदका लागि औपचारिक निर्देशन प्राप्त भएको जानकारी दिए ।

आइतबार प्रमुख जिल्ला अधिकारीको अध्यक्षतामा बसेको प्राथमिक खरिद समिति बैठकले मूल्य, मापदण्ड र खरिद प्रक्रिया सम्बन्धी अन्तिम निर्णय गरेपछि सोमबारदेखि खरिद सुरु गरिएको हो । कम्पनीका अनुसार यस वर्ष किसानलाई बिक्रीको रकम नगदमा नभई सिधै उनीहरूको व्यक्तिगत बैंक खातामा जम्मा गरिने व्यवस्था गरिएको छ । यस प्रणालीले भुक्तानीमा पारदर्शिता र सहजता ल्याउने उद्देश्य राखिएको कम्पनीका सूचना अधिकारी चेतन कठायतले बताए ।

किसान प्रतिनिधि शिव प्रसाद चौधरीको नेतृत्वमा पुगेको टोलीसँगको छलफलमा किसानहरूले विगतमा खरिद ढिलो हुँदा धान सड्ने, बजारमा मूल्य घट्ने र बिचौलियाको फाइदा हुने समस्या दोहोरिएको गुनासो राखेका थिए । प्रमुख पाण्डेले यस वर्ष ती कमजोरी नदोहरिने आश्वासन दिए । उनका अनुसार कृषकले उत्पादन गरेको धान उचित मूल्यमा बेच्न सकून् भन्ने कम्पनीको प्राथमिकता रहेको छ ।

राजापुर क्षेत्रमा यस वर्ष धान उत्पादन राम्रो भए पनि निजी व्यापारीहरूले मूल्य कम तोक्ने र तत्काल खरिद नगर्ने भएकाले किसानहरू धान घरमै थन्क्याएर राख्न बाध्य भएका छन् । सरकारी खरिद सुरु भएपछि उनीहरूमा राहतको आशा जगाएको छ । चौधरीले भने, “सरकारले खरिद प्रक्रिया समयमै सुरु गर्न लागेको जानकारीले हामी किसान उत्साहित भएका छौं ।”

कम्पनीले गत वर्षभन्दा यो वर्ष धान खरिद लक्ष्य बढाएको छ । गोदाम मर्मत, बोरा, तौल उपकरण र कर्मचारी व्यवस्थापन पूरा भइसकेको कम्पनीले जनाएको छ । प्रमुख पाण्डेले किसानलाई शुद्ध, सुक्खा र मापदण्डअनुसारको धान ल्याउन आग्रह गर्दै मापदण्ड नपुगेको धान खरिद गर्न नसकिने चेतावनी पनि दिए ।

राजापुरमा सुरु भएको सरकारी खरिद कार्यक्रमले त्यहाँका किसानलाई राहत दिने अपेक्षा गरिएको छ । तर बर्दियाका अन्य सात पालिकाका किसान भने सरकारी खरिदको पहुँचमा नपर्दा सस्तोमा धान बेचेर नोक्सानी बेहोर्दै आएका छन् । किसानहरूले आगामी वर्षदेखि सबै पालिकाबाट पनि धान खरिदको व्यवस्था गर्न सरकार र कम्पनीलाई आग्रह गरेका छन् ।