खोज

भैरहवा, १२ कात्तिक ।

उद्योगपति तथा सांसद विनोद चौधरी छठ पर्वको शुभकामना आदान प्रदानको लागि प्रत्येक वर्ष पश्चिम नवलपरासीको बर्दघाटमा रहेको आफ्नो कार्यालय पुग्ने गरेका छन् । यस वर्ष उनको लागि आफ्नो कार्यालय आगमन भने त्यति सुखद रहेन ।

गाडीबाट झर्ने बित्तिकै चौधरी कार्यालय नपुगी सोझै जलेको संरचना हेर्न थाले । उनको कार्यालयका भित्ताहरूमा थारु कला संस्कृति कोरिएको छ । तर भदौ २४ गते भएको आन्दोलनको क्रममा गरिएको आगजनीका कारण ती भित्ताहरू कालो भएका छन् । चौधरीका शयन कक्ष लगायत सबै कोठा भित्रबाट जलेका छन् ।

चौधरीले सोमबार बर्दघाट नगरपालिका वडा नम्बर ७ स्थित आफ्नो जलेको घरको निरीक्षण गर्दै भावुक देखिए । निरीक्षणका क्रममा चौधरीले सञ्चारकर्मीहरू सँग संक्षिप्त कुराकानी गर्दै आन्दोलनको क्रममा देशमा “ठुलो दुर्घटना” भएको टिप्पणी गरे ।

सञ्चारकर्मीहरूसँग कुरा गर्दै पूर्व सांसद चौधरीले यस घटनालाई आफ्नो व्यक्तिगत मात्र नभई सम्पूर्ण क्षेत्रका जनतासँग जोडिएको सामाजिक विषयको रूपमा लिएको बताए ।

चौधरीले आफ्नो घर जलेको घटनालाई केवल व्यक्तिगत क्षतिमा सीमित नराखी यस क्षेत्रका सम्पूर्ण क्षेत्रवासीसँगको सम्बन्धको धरातलमा उभिएर हेरेको बताए । उनले भने, “यो मेरो लागि एउटा नितान्त सामाजिक, मेरो आफ्नो यो क्षेत्रसँग यहाँका सबै दाजुभाइ दिदीबहिनीसँगको सम्बन्धको धरातलमा उभिएर गरिएको छोटो अवसर हो, म यहाँ छठमा सधैँ आउने गर्थेँ, आज पनि आएँ ।”

चौधरीले उक्त दुर्घटनामा ज्यान गुमाएका जेन्जी प्रति श्रद्धाञ्जली व्यक्त गरे । चौधरीको भनाइले आगलागी वा क्षतिको घटना प्राकृतिक कारण वा सामान्य दुर्घटना मात्र नभएर यसमा बाह्य वा अन्य “तत्त्वहरू” को संलग्नता रहेको हुनसक्ने गम्भीर सङ्केत गरेको छ ।

घटनाको कारण वा पछाडिको परिस्थितिबारे बोल्दै उनले महत्त्वपूर्ण सङ्केत गरेका छन् । उनले भने, “यसै क्रममा विभिन्न अरू पनि यस्ता तत्त्वहरू यसमा प्रवेश गरे, त्यो खुला छ र त्यसैको परिणति तपाईँले यहाँ मेरो यो क्षेत्रको घरमा देख्दै हुनुहुन्छ ।”

सांसद चौधरीले आफ्नो घरमा भएको क्षतिलाई “विकासप्रतिको निराशा” बाट उत्पन्न भावनात्मक र नकारात्मक धरातलमा उभिएर गरिएको कार्यको परिणति भएको टिप्पणी गरे । चौधरीले नेपालको विकास, रोजगारी र स्वाभिमानी जीवनका लागि युवा (जेन्जी) ले राखेको अपेक्षाले नै आफूलाई राजनीतिमा प्रवेश गर्न प्रेरित गरेको बताए ।

“मलाई त्यही जिम्मेवारी बोधले नै अगाडि ल्याएको हो । मलाई राजनीति भनेको न नामको लागि चाहिएको हो, न दामको लागि चाहिएको हो,“ उनले स्पष्ट पारे ।

उनले घटनालाई विचार गर्दै सबैलाई जेन्जीको भावनालाई कदर गर्न र त्यसलाई बिथोल्न खोज्नेहरूलाई पाखा लगाउँदै जानुपर्ने आवश्यकता औँल्याए । चौधरीले आफ्नो जलेको घरको अगाडि उभिएर नै नेपालमा सकारात्मक परिवर्तन आयो भने आफू सबैभन्दा सन्तुष्ट व्यक्ति हुने कुरामा जोड दिए ।