खोज

 कञ्चनपुर, ४ कात्तिक ।

महाकाली नदी किनारमा अन्त्येष्टि अघि विपिन जोशीको शवयात्रा सुरु भएको छ । भीमदत्त नगरपालिकाबाट केहीबेर अघि शवयात्रा सुरु भएको हो । शवयात्रामा नेपालका लागि इजरायली राजदूत समेत सहभागी भएका छन् ।

उनको अन्त्येष्टि महाकाली नदीको भुजेला घाटमा गरिने भएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) सागर बोहराले विपिन जोशीको अन्त्येष्टि धार्मिक परम्पराअनुसार राष्ट्रिय सम्मानसहित गरिने जानकारी दिएका छन् । उनका अनुसार विपिन जोशीको सम्मानमा सशस्त्र प्रहरीले सलामी अर्पण गर्नेछ ।

अध्ययनको सिलसिलामा इजरायल पुगेका कञ्चनपुरका विपिन जोशी सन् २०२३ अक्टोबर ७ मा हमासले किबुत्ज क्षेत्रमा गरेको आक्रमणका क्रममा बन्धक बनाइएका थिए । त्यसपछि उनको अवस्था अज्ञात रह्यो । गत असोज २७ गते इजरायली अधिकारीहरूले उनको मृत्यु पुष्टि गरेका थिए ।

इजरायलबाट सोमबार मात्र जोशीको शव नेपाल ल्याइएको थियो । काठमाडौंबाट नेपाली सेनाले स्काई ट्रकमार्फत धनगढी विमानस्थलमा ल्याएको विपिनको शवमा सलामी अर्पण गरी परिवारलाई बुझाइएको थियो ।

विपिनको शव ल्याइएपछि नेपालका लागि इजरायली राजदूतसहितका तीन जना इजरायली प्रतिनिधिको टोलीले विपिन जोशीको घरमै पुगेर परिवारलाई सहानुभूति प्रकट गरेको थियो ।