खोज

गुल्मी, ०२ कार्तिक ।

वर्षौँसम्म उपयोग विहीन भएर त्यत्तिकै खेर गइरहेको बाँझो जमिन यति बेला सयपत्री फूलको थुँगाले रङ्गीचङ्गी बनेको छ । प्लास्टिकको टनेल भित्र ढकमक्क फुलेका र फुल्दै गरेका सयपत्रीले तिहार भित्रिसकेको झल्को दिइरहेको छ ।

तिनै सयपत्री फूल पुलाउने कृषक हुन जिल्लाको धुर्कोट गाउँपालिका –३, हाडहाडे निवासी युवा कृषक भविन्द्र घर्तिमगर । घर्तीले जिल्लाको रेसुङ्गा नगरपालिका –३ मा रहेको गुठीको एक सय रोपनी जग्गा भाडामा लिएर व्यावसायिक कृषि कर्म गर्दै आइरहेका छन् ।

उनले विगत दुई वर्षदेखि जिल्लामा व्यावसायिक रूपमा फूल खेती गर्न सुरु गरेका हुन । फुलबाट मनग्ये आम्दानी हुने देखेपछि उनी फूल खेतीमा आकर्षित बनेका हुन । घर्तीको टनेलमा यति बेला दुई हजार भन्दा धेरै सयपत्री फूलका बोटहरू छन् ।

झबिन्द्रले उत्पादन गरेको फूल अहिले बजारमा फुटकर प्रतिकिलो ५०० रुपैयाँमा बिक्री हुँदै आएको छ ।
गत वर्ष गरेको फूल खेतीबाट राम्रो आम्दानी गरेपछि उनले यस पटक पनि त्यसलाई निरन्तरता दिएको बताए ।

“आठ वर्षदेखि व्यावसायिक रूपमा तरकारी खेती गर्थे, फूल खेतीमा त्यति अनुभव थिएन त्यसैले गत वर्ष केही फूल टनेल बाहिर पनि लगाए, यस पटक सबै टनेल भित्र रोपेको छु, निकै राम्रो छ,” उनले भने ।

टनेल बाहिर लगाएको फूल लामो समयसम्म नरहने र चाँडै बिग्रिने हुँदा टनेल भित्र लगाउँदा खासै समस्या नहुने र लामो समय राख्न सकिने भएका कारण उनले टनेल बनाएर फूल रोपेका हुन ।

यस पटक फूल बिक्रीबाट आफूले तीन लाख रुपैयाँ आम्दानी गर्ने लक्ष्य राखेको भबिन्द्रले बताए । फूल किन्नको लागि मानिसहरू आफै उनको बगैँचासम्म पुग्ने गर्दछन् ।

तिहार नजिकिँदै गर्दा फूलको माग धेरै आइरहेको भन्दै उनले सबै फूलहरू स्थानीय बजारमै खपत हुने बताएका छन् । यस पटक तिहार चाँडै परेका कारण मानिसहरूले घरघरमा रोपेका फूलहरू अझै पुलिसकेका छैनन् ।

जसका कारण गत वर्षको तुलनामा यस पटक जिल्लामा कमै मात्रमा फूल उत्पादन भएको छ ।  भबिन्द्रले विगत दश वर्षदेखि जिल्लामा रेसुङ्गा एग्रो बिजनेस कन्र्सन दर्ता गरेर व्यावसायिक रूपमा कृषि र पशुपालन क्षेत्रमा काम गर्दै आइरहेका छन् ।

पछिल्लो समयमा उनले रेसुङ्गा नगरपालिका–३ स्थित बेहोरेमा एक सय रोपनी गुठीको जग्गा भाडामा लिएर कृषि र पशुपालन व्यवसाय गर्दै आइरहेका छन् ।

उनको फर्ममा अहिले बङ्गुर बाख्रा र कुखुरादेखि विभिन्न प्रकारका तरकारीहरू उत्पादन हुने गर्दछ । यसबाट वार्षिक ५० लाख रुपैयाँ बराबरको आर्थिक कारोबार गर्दै आएको घर्तीले बताए ।

जिल्लामा धुर्कोट गाउँपालिकाले विगत सात वर्षदेखि पालिकामा प्लास्टिकका माला बिक्री वितरणमा प्रतिबन्ध लगाएको छ ।