खोज

बुटवल, २८ मंसिर ।

फोक्सोबारे सचेतना दिन मध्येनजर गरी चौराहा हस्पिटल प्रालिले निःशुल्क फोक्सो जाँच तथा परामर्श कार्यक्रम गरेको छ ।

सामाजिक उत्तरदायित्वमा रहेर अस्पतालले प्रत्येक महिनाको अन्तिम बुधबार बिरामीहरुलाई फोक्सोको काम, सुरक्षाको विषयमा जानकारी दिने गरी निःशुल्क परामर्श तथा परीक्षणको काम गरेको हो । एक महिनाको अवधिमा अस्पतालमा उपचारमा आउने बिरामीहरुमा खोकी, फोक्सोमा समस्या भएका दमका बिरामी बढी देखिएको अस्पतालका फिजिसियन डा सरोज थापाले बताए ।

फोक्सो शरीरको महत्वपूर्ण अंग हो । शरीरलाई चाहिने अक्सिजन लिने र कार्वनडाईअक्साइड बाहिर फयाँक्ने काम फोक्सोले गर्छ । शरीरको हरेक अंगहरुमा अक्सिजन पु¥याउँछ । यसैबीच बुधबार लुम्बिनी प्रदेश ट्राफिक प्रहरी कार्यालयका ७० जना सहित श्वास प्रश्वासमा समस्या भएका बिरामीको जाँच गरिएको उनले बताए । फोक्सोको पम्लरी फन्सनल टेष्ट (पिएफटी) मा फोक्सोले प्रतिसेकेन्ड सास लिने र फयाँक्ने गति मापन गरी त्यसको आधारमा दम भए नभएको छुट्टयाउने र समस्याबारे जानकारी दिईएको उनले बताए ।

अस्पतालका म्यानेजिङ डाईरेक्टर बिरु भण्डारीले सामाजिक उत्तरदायित्व अन्तर्गत वर्षभरि नै विभिन्न स्थानमा निःशुल्क स्वस्थ्य शिविरका साथै अस्पताल परिसरमा चिकित्सकीय परीक्षण र औषधि वितरणका कार्यक्रमहरु चलाउँदै आएको बताए । निजी लगानीमा संचालन भएको अस्पतालबाट विशेषज्ञ सेवासंगै ट्रमा सेवालाई विशेष प्राथमिकता दिएको उनले बताए ।

सडक दुर्घटना बढी हुने लुम्बिनी प्रदेशमै ट्रमा सेवामा आफुहरु अगाडि रहेको उनले बताए । अस्पतालमा न्युरोसर्जरी, जनरल सर्जरी, ईएनटी, महिला तथा प्रसुति, डेन्टल, कार्डियो, अर्थो, मानसिक रोग विशेषज्ञ चिकित्सकहरुबाट सेवा दिदै आएको छ । अस्पतालले प्रत्येक महिनाको अन्तिम बुधबार फ्रि पल्मनरी फन्सन टेष्ट र हरेक हप्ता विहीबार निःशुल्क फिजिसियन र सुगर परीक्षण तथा परामर्श गर्दै आएको उनले बताए ।

रुपन्देहीमा पूर्वाधार निर्माणको कामसंगै चिसो र धुलोधुवाका कारण वायु प्रदुषण बढेको छ । त्यसमा पनि अधिकांश समय सडकमा बस्नुपर्ने ट्राफिक प्रहरीहरुमा श्वासप्रश्वासको समस्या बढी हुने भएकाले उनीहरुलाई लक्षित गरी कार्यक्रम गरिएको उनले बताए । साउनदेखि सुुरु गरेको निःशुल्क सेवामा ७ सय जना भन्दा बढीले सेवा लिएको उनले बताए । अस्पतालमा १५ जना चिकित्सकहरुसहित १ सय ५० जनाले सेवा दिईरहेका छन् । अस्पतालमा अर्घाखाँची, गुल्मी, दाङ लगायत लुम्बिनी प्रदेशसहित अन्य छिमेकी जिल्लाबाट समेत विरामीहरु आउने गर्दछन् ।