खोज

 गुल्मी, ११ असोज । 

गुल्मीमा पछिल्लो समयमा किसानहरू व्यावसायिक रूपमा पशुपालन क्षेत्रतर्फ आकर्षित हुन थालेका छन् । यसबाट किसानहरूमा समृद्धिको आशा पलाउन थालेको छ ।

पहाडी जिल्लाहरूमा ठुला उद्योग तथा कलकारखानाहरू नहुने भएका कारण पशुपालन क्षेत्र किसानहरूका लागि एउटा समृद्धिको मुख्य आधार बन्दै जान थालेको छ ।

जिल्लामा आर्थिक वर्ष २०८१/०८२ मा चार अर्ब भन्दा बढीको पशुजन्य उत्पादन भएको छ । भेटेरिनरी अस्पताल तथा पशु सेवा विज्ञ केन्द्रले दिएको तथ्याङ्क अनुसार गत आर्थिक वर्षमा मासु, दूध र अण्डा गरेर चार अर्ब ५९ करोड २९ लाख रुपैयाँ भन्दा बढीको पशुजन्य उत्पादन भएको छ ।

जस अन्तर्गत एक अर्ब ८४ करोड ३८ लाख रुपैयाँको दूध उत्पादन भएको बताइएको छ ।  किसानहरूले गाईको तुलनामा भैँसीको दूध उत्पादनमा बढी जोड दिन थालेका छन् ।

दूध उत्पादनमध्ये गाईको दूध छ हजार तीन सय ८१ मेट्रिकटन र भैंसीको दूध १६ हजार चार सय ३७ मेट्रिकटन उत्पादन भएको भेटेरिनरी अस्पताल तथा पशु सेवा विज्ञ केन्द्र गुल्मीका प्रमुख हुमकान्त पाण्डेयले जानकारी दिएका छन् ।

भेटेरिनरी अस्पताल तथा पशु सेवा विज्ञ केन्द्रका अनुसार आर्थिक वर्ष २०८०/०८१ को तुलनामा आर्थिक वर्ष २०८१÷०८२ मा २.५१ प्रतिशतले दूधको उत्पादनमा वृद्धि भएको छ ।

अहिले जिल्ला बाहिर दैनिक पन्ध्र सय लिटर दूध निर्यात गरिँदै आएको छ । जिल्लामा अन्य पालिकाहरूको तुलनामा सत्यवती र रुरुक्षेत्र गाउँपालिकामा रहेका फर्मबाट बढिमात्रामा दूध बिक्री हुने गर्दछ ।

किसानहरूले उत्पादन गरेको दूध स्थानीय सहकारी र प्राईभेट डेरीमा (व्यक्तिगत) सङ्कलन हुने गर्दछ । उक्त सङ्कलित दूध स्थानीय बजारमा खपत भएर बाँकी रहेको दूध, रूपन्देही र पोखरा पठाउने गरिन्छ ।

यसै गरी गुल्मीमा राँगो, खसी बोका, कुखुरा, सुँगुरबुँगुर तथा भेडागरि दुई अर्ब ५८ लाख २३ हजार रुपैयाँ बरावरको मासु उत्पादन हुने गरेको कार्यालय प्रमुख पाण्डेले बताए । गत आर्थिक वर्षमा जिल्लाबाट पन्ध्र हजार खसी बोका, एक हजार नौ सय राँगाभैंसी र पाँच लाख ४७ हजार पाँच सय लिटर दूध बाहिर निर्यात भएको कार्यालयले जनाएको छ ।