खोज

लमही ,२९ भदौ ।

जेनजी आन्दोलनका क्रममा भएको आगजनी र तोडफोडमा आफ्नो घर जलेपछि पूर्व मन्त्री तथा समाजसेवी डिल्ली बहादुर चौधरीले गहिरो पीडा व्यक्त गरेका छन् ।

उनले मृत्यु भएकाप्रति श्रद्धाञ्जली अर्पण गर्दै घाइतेहरूलाई शीघ्र स्वास्थ्य लाभको कामना पनि गरेका छन् ।

चौधरीले विज्ञप्ति जारी गर्दै आन्दोलनको नाममा गरिएका तोडफोड, आगजनी र लुटपाटलाई राजनीतिक प्रतिशोधको परिणाम भन्दै आक्रोश व्यक्त गरेका छन् । “मेरो घर मात्र जलेको छैन, मेरो पसिना, चार दशकको श्रम र मेहनत जलेको छ,” उनले भनेका छन् ।

उनले आफ्ना सम्पत्ति कुनै अनियमितताबाट नभई वैदेशिक अध्ययन–अध्यापन, जागिर र समाजसेवाबाट कमाएको पसिनाको कमाइ भएको उल्लेख गरेका छन् ।

“देश–विदेशमा पढाएर बचत गरेको पैसा, मासिक ३०० रुपैयाँ तलब पाउँदा सुरुवात गरेको जीवन–सङ्घर्षको फललाई खरानी बनाइएको हो,” चौधरीको भनाइ छ ।

राजनीतिक प्रतिशोधका कारण आफ्नो परिवारको सपना भत्काइएको दाबी गर्दै उनले आन्दोलनकारी भेषमा घुसपैठ गर्ने, सरकारी संरचना र निजी सम्पत्तिमा क्षति पुर्‍याउनेलाई कानुनी कारबाही गर्न माग गरेका छन् ।

“आन्दोलन केवल उद्दण्डता र विध्वंस होइन, विसङ्गति र बेथितिविरुद्धको आवाज हो भन्ने विश्वास गर्छु,” उनले स्पष्ट पारे ।

सङ्घर्षपूर्ण जीवनको स्मरण गर्दै चौधरीले पञ्चायतदेखि माओवादी द्वन्द्व र मुक्त कमैया अभियानसम्म आफूले निरन्तर जोखिम मोल्दै आएको उल्लेख गरेका छन् ।

“त्यस बेला गोलीले जीवन लिएको थिएन, आज घर जलाएको छ, तर मेरो मन जलेको छैन। आँट, साहस र सङ्घर्ष गर्ने क्षमतामा कमी आएको छैन,” चौधरीले भनेका छन् ।

उनले आन्दोलनको नाममा घरमा लुटपाट, चोरी र गलत प्रचार समेत गरिएको आरोप लगाएका छन्। घरभित्र रहेका गरगहना, रकम र सामग्री समेत हराएको जानकारी दिएका छन् ।

“यो घर मेरो मात्र होइन, मेरो आमा, श्रीमती, छोरी र छोराको सपना थियो,” चौधरीले भनेका छन्, “तर म आत्तिएको छैन, फेरि जुरुक्क उठ्नेछु ।”