खोज

नेपालगन्ज, १५ भदौ ।  

नेपाली काँग्रेसका केन्द्रीय उपसभापति धनराज गुरुङले पार्टीलाई बलियो बनाउन काँग्रेसभित्र हार्दिकता आवश्यक रहेको बताएका छन् ।

नेपाली काँग्रेस, प्रशिक्षण शाखा बाँकेद्वारा आज नेपालगन्जमा आयोजित जिल्ला स्तरीय प्रशिक्षण कार्यक्रमको उद्घाटन गर्दै उपसभापति गुरुङले पार्टीलाई बलियो तथा एकताबद्ध बनाउन कार्यकर्ताबिच आपसी सहकार्यको खाँचो रहेको बताए ।

आगामी निर्वाचनमा नेपाली काँग्रेसलाई स्पष्ट बहुमतका साथ विजयी गराउन सबैभन्दा पहिला कार्यकर्ताहरूको मन माझिनुपर्नेमा जोड दिँदै उपसभापति गुरुङले पार्टी तहको प्रशिक्षणले कार्यकर्तालाई आपसमा जोडने काम गर्ने उल्लेख गरे ।

नेपाली काँग्रेस बाँकेका सभापति नारायणप्रसाद गौडेलले बाँके काँग्रेसले कार्यकर्ताहरूलाई निरन्तर प्रशिक्षित बनाउँदै लगेको बताए । उनले पालिका र वडा तहमा नेतृत्व गर्ने सबैलाई प्रशिक्षित गराउने काम सम्पन्न भइसकेको उल्लेख जानकारी दिए ।

सभापति गौडेलले प्रशिक्षण कार्यक्रमका माध्यमबाट गाउँ टोल हुँदै पार्टीलाई बलियो बनाउने अभियानमा आफूहरू लागिपरेको समेत बताए ।
प्रशिक्षण कार्यक्रममा बाँके जिल्ला कार्यसमितिका पदाधिकारी तथा सदस्यहरू, महासमिति तथा महाधिवेशन प्रतिनिधिहरू, प्रदेश सभा क्षेत्र तथा पालिका कार्यसमितिका पदाधिकारीहरू, निर्वाचित पालिका प्रमुख तथा उपप्रमुखहरू र भातृ संस्थाका केन्द्रीय पदाधिकारीलगायत करिब २७५ जनाको सहभागिता रहेको प्रशिक्षण शाखा सचिव उमा थापामगरले जानकारी दिइन् ।

प्रशिक्षण दुई दिन सम्म सञ्चालन हुने बताइएको छ ।