खोज

 जितपुर, १४ भदौ ।

“रुख रोपौँ, बन जोगाऔँ” भन्ने मूल नाराका साथ वाणगंगा नगरपालिका–९ मा अवस्थित जनजागरण सामुदायिक बन उपभोक्ता समूहले आफ्नो २४औँ वार्षिक साधारण सभा तथा ७औँ अधिवेशन सम्पन्न गरेको छ ।

कार्यक्रममा समूहका सचिव जनक बहादुर खत्रीले वार्षिक प्रगति विवरण प्रस्तुत गरेका थिए भने कोषाध्यक्ष रिता रायमाझीले आर्थिक वर्ष २०८१/८२ को कुल ५४ लाख ८८ हजार रुपैयाँ बराबरको आय–व्यय सार्वजनिक गरेकी थिइन् ।

सो अवसरमा अध्यक्ष देवीराम पौडेलले सामुदायिक बनको भावी रणनीति, योजना र आगामी दिनमा थप प्रभावकारी ढङ्गले काम गर्ने प्रतिबद्धता व्यक्त गरे ।
साधारण सभामा सामुदायिक बन अन्तर्गत रहेका उपभोक्ता सदस्यमध्ये ७७ देखि ८० वर्ष उमेर समूहका एकल तथा ज्येष्ठ नागरिक गरी १५ जनालाई दोसल्ला ओढाई र नगद १–१ हजार रुपैयाँ प्रदान गरेर सम्मान गरिएको थियो ।

कार्यक्रमका प्रमुख अतिथि तथा सब–डिभिजन वन कार्यालय गोरुसिङ्गेका प्रमुख मोतीराम पौडेलले सामुदायिक बनले कार्य गर्दा नीति, नियम र योजनाअनुसार पारदर्शी ढङ्गले अगाडि बढ्नुपर्ने बताए ।

उनले संरक्षण र संवर्द्धनसँगै उत्पादनमूलक कामलाई पनि जोड दिनुपर्नेमा जोड दिँदै जिल्लामै छिट्टै साधारण सभा सम्पन्न गरेकोमा धन्यवाद ज्ञापन गरेका थिए । वानपा–९ का वडा अध्यक्ष कमल पौडेलले सामुदायिक बनले विकास निर्माणको कार्यमा वडासँग समन्वय गर्दै समुदायमा सकारात्मक सन्देश दिएको उल्लेख गर्दै सफलताको शुभकामना दिएका थिए ।

७औँ अधिवेशनबाट पुनः देवीराम पौडेललाई अध्यक्षमा सर्वसम्मत चयन गरिएको छ। अन्य पदाधिकारीहरूमा
उपाध्यक्ष : सुनिता सुनार,सचिव : रिता रायमाझी,कोषाध्यक्षमा जनक बहादुर खत्री
सह–सचिव : सरिता बेल्बासे (पौडेल)
सदस्यहरू : शुशिला भुसाल, लिल बहादुर बि.क., हरि प्रसाद पोख्रेल, खुमानन्द पोख्रेल, सरिता खनाल र जितेन्द्र खत्री रहेको निर्वाचन मण्डलका संयोजक रोम बहादुर खत्रीले जानकारी दिए  ।

कार्यक्रममा सामुदायिक बनका तर्फबाट कुन्तामणि भुसालले आफ्नो धारणा राख्दै साधारण सभा सफलताको शुभकामना व्यक्त गरेका थिए। साथै, छिमेकी सामुदायिक बनका अध्यक्ष, समाजसेवी, पत्रकार तथा बुद्धिजीवीको समेत उल्लेख्य सहभागिता रहेको थियो ।

जनजागरण सामुदायिक बन ८० हेक्टर क्षेत्रफलमा फैलिएको छ। यस बनमा हाल १सय १८ जना उपभोक्ता सदस्यहरू आबद्ध रहेका छन् । कार्यक्रममा सह–सचिव जितेन्द्र खत्रीले स्वागत मन्तव्य राखेका थिए भने सचिव जनक बहादुर खत्रीले सञ्चालन गरेका थिए । अन्त्यमा अध्यक्ष देवीराम पौडेलले सबै सहभागीलाई धन्यवाद ज्ञापन गरेका थिए  ।