खोज

जितपुर, १३ भदौ ।

कपिलवस्तु जिल्लामा पहिलो पटक दन्त प्रत्यारोपण सफलतापूर्वक सम्पन्न भएको छ । वाणगंगा नगरपालिका–४, जितपुरस्थित फेमिली डेन्टल केयर सेन्टर प्रा.लि. मा मंगलबार सम्पन्न सो शल्यक्रियाले कपिलवस्तुमा दन्त उपचारको क्षेत्रमा नयाँ युगको सुरुवात गरेको छ ।

फेमिली डेन्टलका सञ्चालक तथा वरिष्ठ हाइजिनिस्ट कृष्ण पोख्रेलले दन्त प्रत्यारोपण शल्यक्रिया पहिलो पटक जिल्लामै सफलतापूर्वक सम्पन्न भएको जानकारी दिए ।

शल्यक्रिया सफलतापूर्वक सम्पन्न गर्ने डा. सम्राट पराईका अनुसार यसअघि यस्तो सेवा लिन बुटवल वा काठमाडौँ धाउनुपर्ने बाध्यता थियो । तर अब अत्याधुनिक दन्त प्रत्यारोपण सुविधा कपिलवस्तु जिल्लामै सहज रूपमा उपलब्ध हुने भएको छ ।

पोख्रेलका अनुसार फेमिली डेन्टल स्थापना भएदेखि नै दक्ष र अनुभवी चिकित्सकहरूको परामर्श तथा उपचारले बिरामीहरूको विश्वास जित्दै आएको छ । यस डेनटलमा दैनिक रूपमा लुम्बिनी प्रादेशिक अस्पताल बुटवल र भैरहवा मेडिकल कलेजका चिकित्सकहरूले समेत सेवा प्रदान गर्दै आएका छन् ।

हाल फेमिली डेनटलमा दाँत सफा गर्ने, फिलिङ गर्ने, जरैदेखि उपचार गर्ने, गिजा उपचार, दाँत उखेल्ने, कृत्रिम दाँत बनाउने, दाँतमा खोल लगाउने, बाँगो–टेडो दाँत सिधा गर्ने, दाँतको एक्स–रे लगायत सम्पूर्ण मुख स्वास्थ्यसम्बन्धी उपचार सुविधा उपलब्ध छन् ।

जिल्लामा मात्र सीमित नभई अर्घाखाँची, रुपन्देही, दाङ, प्युठानलगायतका छिमेकी जिल्लाबाट समेत बिरामीहरू उपचारका लागि फेमिली डेनटलमा आउने गरेको सञ्चालक पोख्रेलले जानकारी दिए ।

दन्त स्वास्थ्यको क्षेत्रमा नयाँ प्रविधि र अत्याधुनिक उपचार विधि थपिँदै गएसँगै कपिलवस्तु जिल्लाका बासिन्दाले सजिलै गुणस्तरीय उपचार पाउने आशा गरिएको छ ।