खोज

बुटवल, २१ मंसिर ।

बुटवलकै पुरानो विद्यालय कान्ति माविमा ६९ औ वार्षिकोत्सवको अवसरमा विविध कार्यक्रमहरु शुभारम्भ भएका छन । वार्षिकोत्सवको अवसर पारेर विद्यालयले अतिरिक्त क्रियाकलाप अन्तर्गत विद्यार्थीहरुबीच खेलकुद, प्रतिभा प्रस्फुटनका कार्यक्रमहरु संचालन गरेको हो ।

मंसिर १७ गतेबाट शुरु भएको अतिरिक्त क्रियाकलाप अन्तरगत क्रिकेट प्रतियोगिताको उपाधि ब्यवस्थापन १२ बिहानी समूहले चुमेको छ । ब्यवस्थापन ११ दिवा समूहलाई ४ विकेटले पराजित गर्दै कक्षा १२ बिहानी समूहले उपाधि चुमेको हो ।

बुधबार भएको फाईनल खेलमा टस जितेर कक्षा ११ ले ब्याटिङ रोज्दै निर्धारित १० ओभरमा ८२ रनको लक्ष्य खडा गरेको थियो । मध्य लक्ष्य पछयाएको कक्षा १२ का ब्याटम्यानहरुले ९ ओभरमा केवल ६ बिकेट गुमाएर जित निकाल्यो । फाइनल खेलमा २४ रनसहित ४ विकेट लिन सफल अलराउण्डर कक्षा १२ का अर्जुन सापकोटा म्यान अफ सिरिजबाट पुरस्कृत भए । क्रिकेट प्रतियोगितामा विद्यालयका विभिन्न २४ टिमले प्रतिस्पर्धा गरेका थिए ।

एक समारोहका बीच विद्यालय ब्यवस्थापन समितिका अध्यक्ष हेमानन्द शर्मा, रुपन्देही जिल्ला खेलकुद विकास समितिका कार्यालय प्रमुख राजेन्द्र श्रेष्ठ, प्राचार्य गोविन्द ज्ञवाली, उपप्राचार्य पूर्णभद्र उपाध्याय, केदारनाथ ज्ञवाली, समूहगत संयोजक भानुभक्त भुसाल, डिल्लीप्रसाद बेल्बासे, विदुर पौडेल, राजन अर्याल, प्रतियोगिताका एम्पायर कृष्ण चँुदाली, सुदिप खनालले विजेता, उपविजेता टिम तथा उत्कृष्ट खेलाडीहरुलाई कप, मेडल, प्रमाणपत्रबाट पुरस्कृत गरेका थिए ।

मंसिर १७ गतेबाट शुरु भएको सप्ताहब्यापी कार्यक्रममा छात्रछात्रा भलिबल, फुटबल, एथ्लेटिक्स, म्याराथान, टेबलटेनिस, ब्याडमिन्टन, कबड्डी लगायतका खेलकुदका साथै साहित्यिक र प्रतिभा प्रस्फुटनका कान्ति डान्स तथा गायन आईडल पुस १ गतेसम्म संचालन हुने विद्यालयका अतिरिक्त क्रियाकलाप प्रमुख महेश खनालले बताए । विद्यालयको वार्षिकोत्सव मूल समारोह पुस २ गते हुने उनले बताए । विद्यालयमा ५ हजार ५ सय विद्याथीहरु र २ सय शिक्षक, कर्मचारीहरु छन् ।