खोज

दाङ, ४ भदौ ।

हरितालिका तीज पर्वको अवसरमा लुम्बिनी प्रदेश सरकारको मन्त्री परिषद्ले बुधबार एक विशेष कार्यक्रमको आयोजना गर्दै संस्कृतिकर्मी, अधिकारीहरू तथा कर्मचारीबीच शुभकामना आदानप्रदान गरेको छ ।

कार्यक्रममा लुम्बिनी प्रदेशका मुख्यमन्त्री चेतनारायण आचार्य, मुख्यसचिव, सचिवहरू तथा अन्य उच्चपदस्थ अधिकारीहरूको सहभागिता रहेको थियो ।

कार्यक्रमलाई सम्बोधन गर्दै मुख्यमन्त्री आचार्यले नेपाली समाजमा धर्म र संस्कृतिको भूमिका अत्यन्तै महत्वपूर्ण रहेको उल्लेख गर्दै धर्म र संस्कृतिले समाजलाई अनुशासित बनाउने, नैतिकता कायम राख्ने तथा सकारात्मक परिवर्तन ल्याउने कार्यमा योगदान पुर्‍याउँदै आएको बताए ।

उनले पछिल्लो समय तीज पर्वलाई विकृत बनाउने विभिन्न प्रवृत्ति देखिएकोप्रति चिन्ता व्यक्त गर्दै यस्तो प्रवृत्ति संस्कृतिमाथि धावा भएको टिप्पणी गरे ।

कार्यक्रममा बोल्दै प्रमुख सचिव बाबुराम अधिकारीले चाडपर्वहरू सामाजिक मूल्य र मान्यतालाई जीवन्त राख्ने आधार भएको उल्लेख गरे । उनले संस्कृतिको वास्तविक मर्म र गहिरो भावलाई जोगाइराख्न सबै तहको सहयोग आवश्यक रहेको धारणा व्यक्त गरे ।

प्रदेश सचिव ईश्वरराज पौडेलले राज्यको समावेशी नीतिका कारण निजामती सेवामा महिला कर्मचारीको सहभागिता उल्लेखनीय रूपमा बढिरहेको बताए ।

स्वास्थ्य सचिव दुर्गालक्ष्मी श्रेष्ठले तीज पर्वलाई मानसिक स्वास्थ्यका लागि लाभदायक रहेको बताउँदै तीजले आत्मीय भावना, सामाजिक सम्बन्ध, र सशक्त विचारको विकासमा सहयोग पुर्‍याउँने जानकारी दिइन ।

कार्यक्रममा सहभागी अन्य वक्ताहरूले पनि तीज जस्ता चाडपर्वहरूले सामाजिक समानता, लैङ्गिक समानता र संस्कृतिक चेतनाको विस्तारमा महत्वपूर्ण भूमिका खेल्ने धारणा राखेका थिए ।