खोज

बुटवल, १९ मंसिर ।

लागुऔषध मुद्दामा एक वर्ष कैद फैसला भई फरार रहेका व्यक्ति चार वर्षपछि पक्राउ परेका छन् । पक्राउ पर्नेमा रुपन्देहीको सैनामैना नगरपालिका वडा नं. १० निबासी पुन्ने प्रसाद चौधरी हुन् ।

२०७५ जेठ २६ गते राति करिब सवा ८ बजे रुपन्देहीको तिलोत्तमा नगरपालिका वडा नं. २ योगिकुटी स्थित प्रहरीद्वारा चेकजाँच गर्ने क्रममा उनी लागुऔषधसहित पक्राउ परेका थिए । प्रहरीले उनलाई भारत सुनौली बजार गई रु १२०० को १ ग्राम ५०० मिलिग्राम लागु औषध ब्राउन सुगर किनी ल्याउँदै गर्दा पक्राउ गरेको थियो ।

त्यसपछि लागु औषध मुद्दा दर्ता गरिएकोमा अनुसन्धान पश्चात जिल्ला अदालत रुपन्देहीको थुनछेक आदेशले रु १० हजार धरौटी माग भएकोमा धरौट जम्मा गरे पश्चात रिहा भएका थिए । त्यसपछि जिल्ला अदालत रुपन्देहीको २०७५ मंसिर २६ गतेको फैसलाले १ बर्ष कैद फैसला भएकोमा फैसला पश्चात उनी फरार थिए ।

फरार रहेका चौधरीलाई ईलाका प्रहरी कार्यालय सालझण्डी रुपन्देहीको प्रहरी निरीक्षक सहितको टोलीले खोजतलास गर्दा पक्राउ परेका हुन् । उनलाई फैसला कार्यान्वयनको लागि जिल्ला अदालत रुपन्देहीमा पेश गरिएकोमा अदालतको आदेशले कारागार चलान गरिएको प्रहरीले जानकारी दिएको छ ।