खोज

दाङ, १९ मङ्सिर ।

दाङमा १९ औँ राष्ट्रिय सामुदायिक महिला स्वास्थ्य स्वयंसेविका दिवस मनाईएको छ । जिल्लाको घोराही उपमहानगरपालिका अन्तर्गत रहेका स्वास्थ्य स्वयंसेविकाहरुले सोमबार एक कार्यक्रम गरी यो दिवस मनाएका हुन् ।

घोराही उपमहानगरपालिकास्तरीय महिला स्वास्थ्य स्वयंसेविका समिति अध्यक्ष बिना खनालको अध्यक्षता तथा घोराही उपमहानगरपालिकाका प्रमुख नरुलाल चौधरीको प्रमुख आतिथ्य एवम् स्वास्थ्य कार्यालय दाङका प्रमुख अंगदबहादुर शाहीको विशिष्ट आतिथ्यमा कार्यक्रम गरी समुदायको स्वास्थ्यमा योगदान पुर्याउँदै आएका स्वयंसेविकाहरुको योगदानका बारेमा चर्चा गरिएको थियोे ।

सो अवसरमा, बाल मृत्युदर, मातृ मृत्युदर कम गर्न तथा नागरिकको स्वास्थ्यमा पहुँच पुर्याउन २०४६ सालदेखि नेपाल सरकारले अघि सारेका स्वास्थ्यका क्षेत्रमा निरन्तर योगदान दिदै आएको हुँदा चुनौतीका रुपमा रहेको पोलियो उन्मुलनदेखि पछिल्लो समय कोरोना विरुद्धको खोप अभियान सफल बनाउन स्वास्थ्य स्वयंसेविकाहरुको भूमिका रहेकोमा जोड दिइएको थियो ।

कार्यक्रममा नगर प्रमुख चौधरीले स्वयंसेविकाहरुले नगरबासीलाई समुदाय स्तरबाट प्रदान गरिने सेवामा साथ दिएकै कारण स्वस्थ नागरिक बनाउन सहयोग मिलेको बताएका थिए । नागरिक स्वस्थ भए मात्रै समाज स्वस्थ हुने र यसले राष्ट्रलाई समृद्धिको यात्रामा सहज बनाउने हुँदा स्वास्थ्य स्वयंसेविकाहरुको मेहनत प्रशंसनीय रहेको बताए ।

स्वास्थ्य कार्यालय दाङका प्रमुख शाहीले सरकारले अघि सारेको स्वास्थ्य सुचकलाई पूरा गर्ने काममा समुदाय स्तरमा रहेर नागरिकको स्वस्थतामा भूमिका खेल्दै आएका स्वयंसेविकाहरुको काम निकै महत्वपूर्ण रहेको बताए ।

दिवसका अवसरमा स्वयंसेविकाहरुले आफुहरुको योगदानको उचित मूल्यांकन गर्दै सामाजिक सुरक्षाको दायरा बढाउन, जीवन बिमाको व्यवस्था गर्न, विभिन्न शीर्षकमा वित्तीय सेवा उपलब्ध गराउनलगायत ७ बुँदे माग राखेका छन् । घोराही उपमहानगरपालिकामा २ सय ३२ जना महिला स्वास्थ्य स्वयंसेविका रहेका छन् ।

कार्यक्रममा नगर स्वास्थ्य प्रवद्र्धन शाखा प्रमुख नारायणप्रसाद घर्ती, स्वास्थ्य स्वयंसेविका शान्ता केसीलगायतले बोलेका थिए । कार्यक्रममा स्वास्थ्य स्वयंसेविका नगर समिति उपाध्यक्ष माया चौधरी, सचिव जीवा आचार्यलगायतले पनि बोलेका थिए ।