खोज

काठमाडौं, २७ साउन ।

साताको दोस्रो दिन मंगलबार सेयर बजारमा पुनः गिरावट आएको छ । अघिल्लो दिनको तुलनामा नेप्से परिसूचक २६.२२ अंकले घट्दै २७९६ विन्दुमा झरेको हो । योसँगै नेप्से सूचक फेरि २८ सयको मनोवैज्ञानिक सीमाभन्दा तल पुगेको छ ।

बजार खुल्दाको पहिलो १५ मिनेट केही स्थिर देखिए पनि त्यसपछि लगातार रातो अंकमा कारोबार भइरहेको देखियो । कुल २५० भन्दा बढी कम्पनीमध्ये आज २२५ कम्पनीको मूल्य घटेको छ भने २४ कम्पनीको मात्र मूल्य बढेको छ । एउटा कम्पनीको मूल्य स्थिर रह्यो ।

कारोबार रकममा समेत गिरावट आएको छ। अघिल्लो दिन १० अर्ब २१ करोड रुपैयाँ बराबरको कारोबार भएकोमा आज त्यसको तुलनामा निकै कम, ६ अर्ब ९१ करोडमा सीमित रह्यो ।

उद्योग समूहतर्फ हेर्दा होटल तथा पर्यटन बाहेक सबै सूचकहरूमा गिरावट आएको छ । होटल तथा पर्यटन समूह १.३२ प्रतिशतले बढेको हो भने बाँकी बैंकिङ, विकास बैंक, फाइनान्स, हाइड्रोपावर, जीवन बीमा, निर्जीवन बीमा, उत्पादन, माइक्रोफाइनान्स, व्यापारलगायतका समूह ०.६२ प्रतिशतदेखि १.५३ प्रतिशतसम्म घटेका छन् ।

आज सिटी होटलको मूल्य १० प्रतिशतले बढेको छ । कम्पनीले ८० प्रतिशत हकप्रद सेयर निष्कासन गर्ने घोषणा गरेपछि मूल्य समायोजन भई वृद्धि भएको हो। यस्तै समाज लघुवित्तको मूल्य ४.३४ र कालिका पावरको मूल्य २.३७ प्रतिशतले बढेको छ ।

सिक्लेस हाइड्रोपावरको मूल्य भने १० प्रतिशतले घटेको छ । त्यस्तै उन्नति सहकार्य लघुवित्त ८ प्रतिशत, लक्ष्मी लघुवित्त ६.१४ प्रतिशतले घटेका छन् ।

धेरै कारोबार भएका कम्पनीहरूमा नेपाल पुनर्बीमा, हिमालयन रिइन्स्योरेन्स, लुम्बिनी विकास बैंक, शिवम् सिमेन्ट र बुटवल पावर रहेका छन् । बजारमा व्यापक गिरावटसँगै लगानीकर्ता पुनः सतर्क देखिएका छन् ।