खोज

बुटवल, २४ साउन । 

गुल्मीकी चन्द्रकला कुमाल प्राविधिक शिक्षा लिन चाहन्थिन, तर घरको आर्थिक अवस्थाका कारण उनले त्यो चाहाना पुरा गर्न सकिनन् । घरको जेठी छोरी उनी साना २ जना भाइहरू पढाउनुपर्ने बाध्यता ।

एसइई पासपछि ३–४ वर्षको पर्खाइपछि बुटवल उपमहानगरपालिकाले उनको यो प्राविधिक शिक्षा पढ्ने सपना साकार पारेको छ यसका लागी हामी आभारी छौँ । सैद्धान्तिक विषयमा भन्दा पनि प्राविधिक विषयले आत्मनिर्भर बन्न सकिन्छ भन्ने विचार राख्ने कुमाल निकै खुसी छन् ।

बुटवल घर भएकी स्नेहा गुरुङको पनि प्राविधिक शिक्षा पढ्ने सपना पुरा भएको छ । पारिवारिक समस्याले गर्दा आफ्नो पढ्ने चाहानालाई पुरा गर्न नसकेकी गुरुङ उपमहानगरको यो अभियानको सूचना देख्नासाथ फर्म भरेको बताइन ।

यता बेल्वास निवासी क्रिष्टना आचार्य पनि प्लस टु अध्ययनरत छन् तर पनि प्राविधिक शिक्षा भनेपछि हुरुक्क हुँदै फर्म भरेको बताइन । २२ जना छोरीहरूले यो अवसरमा मेकानिकल विषयमा अध्ययन गर्दै छन् ।

छोरीहरूलाई सिपमूलक शिक्षा प्रदान गर्ने उद्देश्यका साथ उपमहानगरले बुटवल टेक्निकल ईन्स्टिच्यूटमा निःशुल्क प्रि.डिप्लोमा (ओभरसियर तह) प्राविधिक शिक्षा पढाउने कार्यक्रम सञ्चालन गरेको हो ।

उपमहानगर प्रमुख खेलराज पाण्डेका अनुसार खासगरि इच्छा र चाहना हुँदाहुँदै पनि पारिवारिक समस्या, आर्थिक अभाव लगायतका विभिन्न कारणबाट शिक्षा पढ्न नपाएका ४० जना छोरीहरूलाई प्राविधिक शिक्षा प्रदान गर्न थालेको बताए ।

प्रि.डिप्लोमा इलेकट्रिकल र मेकानिकल इन्जिनियरिङ २०–२० जनागरि कुल ४० जना छोरीहरूले यो अवसर पाएका हुन् । बुटवल टेक्निकल ईन्स्टिच्युटमा ईलेक्ट्रिकल र मेकानिकल विषयमा दुईबर्षे प्रि.डिप्लोमा कोर्ष अध्ययन गर्ने क्रममा सबै शैक्षिक शुल्क उपमहानगरले भुक्तानी गर्ने प्रमुख पाण्डेले बताए ।

प्राविधिक क्षेत्रमा दक्षता बढाउने गरी बुटवल उपमहानगरपालिकाले शिक्षा क्षेत्रमा नमुना कदम चालेको हो ।  उपप्रमुख सावित्रीदेवी अर्याल भन्छिन्–‘प्राविधिक शिक्षा प्राप्त छोरीहरू भविष्यमा सफल व्यवसायीक रूपमा आत्मनिर्भर भएर अघि बढ्ने छन् ।

हामीले बुटवलमात्रै होइन गुल्मी, पाल्पा, अर्घाखाँची, स्याङ्जा, दाङ, रोल्पा, रुकुम, नवलपरासी, कपिलवस्तु जिल्लाका छोरीहरूलाई यो अभियानमा जोडेका छौँ ।

आर्थिक रूपमा कमजोर परिवार, दलित, सिमान्कृत, आदी वासी, जनजाति समुदायका जुन पढ्ने रहर भएर पनि पढ्ने अवसरबाट वञ्चित रहेका छोरीहरूको उज्ज्वल भविष्यको सपना साकार पार्न नेपालमै पहिलो पटक यसरी धेरै सङ्ख्यामा छोरीहरूलाई निःशुल्क रूपमा प्राविधिक शिक्षा पढाउन थालेको उपप्रमुख अर्यालले बताइन ।

प्रमुख प्रशासकीय अधिकृत मित्रमणी खनालले बुटवल टेक्निकल इन्स्टिच्युटमा सैद्धान्तिक र देव दह मेडिकल कलेजमा प्रयोगात्मक रूपमा तालिम सञ्चालन गरिने बताए । “छोरी पढाऊ, समाज बनाऊ” अभियानले समाजमा सकारात्मक सन्देश प्रवाह गरेको बताए ।