खोज

बुटवल, २४ साउन । 

बुटवलका संस्कृत साहित्याचार्य बुद्धिप्रसाद शर्मा पाण्डेयले पवित्र जनै लगाउन आग्रह गरेका छन् । उनले पछिल्लो समयमा पुराना प्रयोग विहीन कपडाहरूलाई प्रशोधन गरेर निकालिएको धागोबाट जनै र रक्षा बन्धनहरू बजारमा आउने भएकाले सचेत रहन आग्रह गरे ।

हामीले प्रयोग गरिरहेका जनै र रक्षा बन्धनहरू जलाउँदा सफा खरानी निस्किएमा शुद्ध जनै र रक्षा बन्धन हो भनेर जनै धारीहरू थाहा पाउनु पर्ने बताए । उनले २०५८ सालदेखि बुटवलमा राधा धागो उद्योगबाट जनै र रक्षा बन्धन उत्पादन गर्दै आएका छन् ।

हामीले प्रयोग गर्ने जने र रक्षा बन्धन शुद्ध नपरेको खण्डमा शरीर चिलाउने विभिन्न प्रकारका घाउहरू आएर समस्या हुने भएकाले सचेत हुनुपर्नेमा पाण्डेयले जोड दिए ।

उनले भगवान् बोलाएर शरीरमा बाँध्ने डोरो र शरीरमा लगाउने जनैलाई हाम्रो धर्म संस्कृतिसँग जोडिने भएकाले पनि यसको महत्त्व धेरैको छ । राधा धागो उद्योगले यो वर्ष १० लाख जनै र रक्षा बन्धन उत्पादन गरेर बजारमा पठाएको छ । यो बाहेक अरू दुई थप उद्योगबाट गरेर ५० लाख धागो उत्पादन गरेको छ ।

यहाँबाट उत्पादन हुने जनैको मूल्य ३ रुपियाँ ४० पैसा, मोटो ३ रुपियाँ ८० पैसा, सेतो ४ रुपियाँ होलसेल मूल्य कायम गरिएको छ । सेतो जनै माग अनुसार तयार गरेर बिक्रीका लागि बजारमा पठाउने गरिन्छ । यो उद्योगमा धागोको काम गर्नेहरूले काम गरे अनुसारको न्यूनतम १० हजार देखि २५ हजार सम्म तलब पाउने गरेको पाण्डेयले जानकारी दिए ।

उनले यहाँबाट उत्पादन हुने जनै र रक्षा बन्धन नेपालको जनैधारी बस्ने सबै स्थानमा र भारतमा सम्म पुग्ने गरेको बताए । यहाँ बत्ती काट्ने देखि जनै र रक्षा बन्धन बनाउने धागो बनाउने गरेर करिब ४ देखि ५ सय सम्मले रोजगारी पाएका छन् ।

धार्मिक परम्परा अनुसार जनै निर्माण गर्दा काँचो सुती धागोलाई ३ सरे गरी बाट्ने र त्यसलाई लेब्य्राउँदा ९ सरे बन्छ त्यसलाई पुन बाट्ने यसरी तैयार गरिएको धागोबाट शस्त्रमा उल्लेख गरिएको विधि अनुसार ५ /५ शिखा पारेर बनाइएको जोडा जनै होर यसलाई लगाउनु पर्छ भन्ने मान्यता रहेको छ ।

नेपालमा जनैधारीहरूको सङ्ख्यालाई आधार मान्ने हो भने करिब २ करोड जनैको माग हुने गरेको पाण्डेयको भनाइ छ ।