खोज

लमही, १९ साउन ।

लुम्बिनी प्रदेश सरकारको स्वास्थ्य मन्त्रालयले एक वर्षको अवधिमा नसर्ने (क्यान्सरजन्य), मुटुको भल्ब फेर्नेदेखि मिर्गौला प्रत्यारोपण रोगको उपचारमा १ करोड रकम खर्चिएको छ । जसमध्ये ३ हजार ८ सय ५१ जनाले सो उपचारार्थ खर्च लिएको जनाइएको छ ।

लुम्बिनी प्रदेश स्वास्थ्य मन्त्री खेम बहादुर सारुले पत्रकार भेटघाट कार्यक्रम गरी वार्षिक कार्य विवरण सार्वजनिक गर्दै यस्तो बताए । मन्त्री सारुले, मन्त्री भएको एक वर्ष पुगेकै दिन आफ्नो वार्षिक कार्यक्रम सार्वजनिक गरेका हुन् ।

उनले आफ्नो कार्यकालमा ८६.५१ प्रतिशत वित्तीय प्रगतिसँगै स्वास्थ्य क्षेत्रमा नवीनतम कार्यक्रम गरेको बताए । त्यसैगरि प्रदेश स्वास्थ्य सूचकाङ्क सुधार गर्ने गति १३ वटा पालिकामा २९ वटा रोमिङ नर्स नियुक्ति गरिएको, ९ वटा विभिन्न नियमावली, निर्देशिका र कार्यदिशा स्वीकृत गरिएको उनले बताए ।

मन्त्रालयमा सुशासन कायम गर्न मन्त्रालय मातहतका ४१ वटा सवारी साधनमा जिपिएस ट्रयाकिङको व्यवस्था, प्रादेशिक अस्पतालमा ५४ प्रकारका औषधिको मूल्यमा एकरूपता, ४ वटा स्वास्थ्य संस्थाको भवन निर्माण, ७ वटा निर्माणाधीन अवस्थामा रहेको तथा ९ जिल्लामा डाइलाइसिस सेवा उपलब्ध गराएको मन्त्री सारुले बताए ।

लुम्बिनी प्रदेशका १२ वटै जिल्ला पूर्ण खोप सुनिश्चितता, ३० स्थानीय तह पूर्णसस्थागत प्रसूति सेवायुक्त, पालिका घोषण, ३ वटा जिल्लामा फेम्ली प्रोफाइल तयार भएको बताए । प्रादेशिक अस्पतालहरूमा सेवा बिस्तारदेखि औजार, उपकरणको व्यवस्थापन प्राविधिक कर्मचारी करारमा भर्ना, मन्त्रालयमा ग्लम्स् सिस्टम मार्फत सेवा प्रवाह र ३९ हजार १ सय ७५ जना ज्येष्ठ नागरिकको लागि घर नै स्वास्थ्य सेवा, ६९ हजार महिलाको प्रसूति सेवा लगायत कार्य गरेको वार्षिक प्रतिवेदन उल्लेख्य रहेको छ ।

मन्त्री सारुले आगामी आर्थिक कार्यक्रम अन्तर्गत प्रदेशमा देखिएको नकारात्मक स्वास्थ्य सुचाङला सुधार गर्नेगरि विशेष पोषण सुधार कार्यक्रम, सबैको पहुँच हुने गरी एकीकृत स्वास्थ्य बिमा कार्यक्रम, मातृ मृत्यु कम गर्न तालिम प्राप्त विशेषज्ञ सहित ग्रामीण अल्टासाउन सेवा सुविधा सञ्चालन गर्ने बताए ।

मेरो स्वास्थ्य मेरो आहार बिहार, भान्सा सुधार लगायतका कार्यक्रम रहेको बताए । यति गर्दा गर्दै राजनैतिक हस्ताक्षर, तीनै वटै सरकारको स्वास्थ्य सम्बन्धी नीति, कार्यविधिले बँझिएको लगायतको चुनौती रहेको बताए ।

गत बर्ष १ करोड ८० लाख बजेट विनियोजन भएको स्वास्थ्य मन्त्रालयमा यस आर्थिक वर्षमा १ करोड बजेट विनियोजन भएका कारण नवीनतम कार्यक्रम सञ्चालनमा भने चुनौती देखिन्छ । कार्यक्रममा स्वास्थ्य सचिव दुर्गालक्ष्मी श्रेष्ठले स्वास्थ्य प्रभावदेखि नीति निर्माणमा नवीनतम कार्य गरेको बताइन् ।