खोज

बुटवल ।

बुटवलस्थित अक्सफोर्ड माध्यमिक विद्यालयले लुम्बिनीको शान्तिभूमिमा भव्य कार्यक्रम आयोजना गर्दै कक्षा ११ मा भर्ना भएका नवआगन्तुक विद्यार्थीहरूलाई स्वागत गरेको छ।

कार्यक्रम कक्षा १२ का विद्यार्थी सन्देश भण्डारीको अध्यक्षतामा सञ्चालन गरिएको थियो भने प्रमुख अतिथिको रूपमा राष्ट्रिय परीक्षा बोर्ड लुम्बिनी प्रदेशका प्रमुख रमाकान्त तिवारीको उपस्थिति रहेको थियो।

स्वागत समारोहमा अभिभावक संघ केन्द्रीय सदस्य तथा रूपन्देही अध्यक्ष लोकनाथ ज्ञवाली, विवेस अध्यक्ष दुर्गादत्त भण्डारी, क्याम्पस प्रमुख मनोज मरासिनी, अध्यक्ष अजित खनाल, संयोजक नारायण सापकोटा, भरत क्षेत्री र बालकृष्ण पोखरेललगायत विशिष्ट व्यक्तिहरूको आतिथ्यता रहेको थियो।

कार्यक्रमको प्रमुख आकर्षणका रूपमा चर्चित हास्य कलाकार मनोज गजुरेलले आफ्ना झरझरिला प्रस्तुतिहरूमार्फत सहभागीहरूलाई भरपूर हसाँउँदै मनोरञ्जन प्रदान गरे। उनको प्रस्तुति कार्यक्रममा नयाँ ऊर्जा थपिएको सहभागीहरूको प्रतिक्रिया थियो।

त्यस्तै, कक्षा १२ का विद्यार्थीहरूले नृत्य र सांस्कृतिक प्रस्तुतिहरू मार्फत नयाँ विद्यार्थीहरूलाई स्वागत गरे। कार्यक्रमलाई थप प्रेरणादायी बनाउन मोटिभेसनल स्पिकर उपेन्द्र अधिकारीले विद्यार्थीहरूलाई अध्ययनमा केन्द्रित हुन र सफलता हासिल गर्ने उपायहरूबारे प्रेरणादायी विचार राखे।

विद्यालयका प्राचार्य दिनेश भुसालले अक्सफोर्डलाई आगामी केही वर्षभित्रै अन्तर्राष्ट्रिय स्तरको शैक्षिक केन्द्र बनाउने लक्ष्य लिएको उल्लेख गर्दै त्यसका लागि गृहकार्य सुरु भइसकेको बताए। विदेशी विद्यार्थीलाई समेत आकर्षित गर्न सकिने वातावरण निर्माण गर्ने अठोट उनले दोहोर्‍याए।

कार्यक्रममा बोल्दै प्रमुख अतिथि रमाकान्त तिवारीले अक्सफोर्डले विगतदेखि नै उत्कृष्ट नतिजा दिँदै आएको स्मरण गर्दै यसै महिनामा प्रकाशित हुने कक्षा १२ को नतिजामा विद्यालयले देशमै पहिलो स्थान हासिल गर्ने विश्वास व्यक्त गरे। साथै, उनले शिक्षालाई व्यवहारिकतासँग जोड्नुपर्ने कुरामा जोड दिए।

कार्यक्रममा क्याम्पस प्रमुख मनोज मरासिनी, अध्यक्ष अजित खनाल, दुर्गादत्त भण्डारी लगायतका वक्ताहरूका साथै विद्यार्थी प्रतिनिधिहरू—प्रतिक भण्डारी, द्विजा आचार्य, विभेचना प्रसाई, सन्ध्या यादव र स्वीकृति अवस्थीले पनि आ-आफ्ना विचार व्यक्त गरे।

कार्यक्रमको सञ्चालन विज्ञान हमाल र निकिता चौहानले गरेका थिए भने संयोजनको जिम्मेवारी झविन्द्र मरासिनीले सम्हालेका थिए। कोर्डिनेटर बालकृष्ण पोखरेलले कार्यक्रमलाई प्रेरणा, मनोरञ्जन र आपसी सद्भावको अनुपम संगम भएको प्रतिक्रिया दिए।