खोज

काठमाडौं ।

नेपाली कांग्रेसका प्रमुख सचेतक श्यामकुमार घिमिरेले भिजिट भिसाको विषयलाई लिएर संसदमा भइरहेको निरन्तर बहस र अवरोधप्रति आलोचना गरेका छन्।

शुक्रबारको प्रतिनिधिसभा बैठकमा बोल्दै उनले भिजिट भिसाको विषयमा अनावश्यक रूपमा चिन्ता व्यक्त गरिँदै आएको भन्दै, यस्तो विषयमा राजनीतिक अति नदेखाउन आग्रह गरे।

प्रत्यक्ष रूपमा रास्वपा र त्यसका सभापति रवि लामिछानेतर्फ संकेत गर्दै घिमिरेले भिजिट भिसाको विषय उठाउनेहरू आफैं अतीतमा त्यसैबाट लाभान्वित भएको उल्लेख गरे।

उनले स्पष्ट शब्दमा भने, “हामीले एउटा अभ्यास गरिसकेका छौँ – भिजिट भिसामा विदेश जाने, त्यहाँको नागरिकता लिने, घरजम गर्ने, नेपाल फर्कने, दुई-चार काण्ड मच्चाउने, पार्टी खोल्ने र गृहमन्त्री हुँदै उपप्रधानमन्त्रीसम्म पुग्ने। त्यो अभ्यास देखिसकेकाले अब त्यसमा चिन्ता गर्नु आवश्यक छैन।”

उनले यस्तो पृष्ठभूमिबाट आएका नेताहरूले अहिले भिजिट भिसाको विषयमा नै सबैभन्दा बढी चिन्ता देखाउनु विडम्बनापूर्ण भएको बताए

। घिमिरेका अनुसार कुनै पनि देशको कानुनअनुसार भिजिट भिसा लिएर नागरिकता लिनु, घरजम गर्नु, त्यसपछि त्यहाँको पासपोर्ट धारण गर्नु अनुचित कार्य हो र अन्तर्राष्ट्रिय अभ्यासअनुसार पनि अस्वीकृत मानिन्छ।

उनले भने, “मलाई आश्चर्य लाग्छ — जसले यस्तै प्रक्रियाबाट यहाँसम्मको सफलताको यात्रा तय गर्नुभयो, अहिले त्यही कुरा लिएर संसदमा अवरोध गरिरहनु भएको छ।”

यस्तो दोहोरो मापदण्ड र विगतलाई बिर्सेर गरिएको आलोचना राजनीतिक हिसाबले पनि स्वाभाविक नहुने घिमिरेको धारणा थियो।

उनले रास्वपा सांसदहरूलाई लक्षित गर्दै भने, “भोलिका दिनमा अरू पनि भिजिट भिसाबाट फर्किने छन् र त्यसै अभ्यास दोहोर्‍याउने छन्। त्यसैले यत्रो चिन्ता लिनुपर्ने विषय होइन।”