काठमाडौं ।
राष्ट्रिय प्रजातन्त्र पार्टी (राप्रपा)का सांसद धवल शमशेर जबराले गत चैत १५ गते काठमाडौंको तिनकुनेमा भएको राजावादी प्रदर्शनलाई राज्यले गलत रूपमा बुझेको दाबी गरेका छन्।
शुक्रबार प्रतिनिधिसभाको बैठकमा बोल्दै उनले शान्तिपूर्ण ढंगले गरिएको विरोध कार्यक्रममा राज्यको पक्षबाट अनावश्यक र अत्यधिक बल प्रयोग भएको उल्लेख गरे।
उनका अनुसार राष्ट्रगान बजिरहेकै बेला मञ्चमै अश्रुग्यास प्रहार गरिएको थियो। उनले आन्दोलनकारीलाई तितरबितर पार्न प्रहरीले सयौं राउण्ड अश्रुग्यास, रबर बुलेट र केही अवस्थामा लाइभ बुलेटसमेत प्रहार गरेको बताए।
त्यसैका कारण एकजनाको मृत्यु भएको र झण्डै २५ जना गोली लागेर घाइते भएका छन् भन्ने जानकारी संसदमा प्रस्तुत गरे।
जबराले घटनाको बेला आफूले पनि ज्यान जोगाउन गल्लीको एउटा सटरमा लुक्नुपरेको स्मरण गरे।
साँझतिर घाइतेहरूको उपचारमा जुटिरहेको अवस्थामा आफूहरूलाई प्रहरीले नियन्त्रणमा लिएर झुठा आरोपसहित पक्राउ गरेको र काठमाडौं प्रहरी परिसरमा थुनिएको दाबी गरे।
उनले आफू र आफ्ना विचारलाई दबाउनका लागि देशद्रोह र संगठित अपराधसमेतको अभियोग लगाइएको बताए। चारवटा झुठा मुद्दा लगाएर निरुत्साहित गर्ने प्रयास भइरहेको भन्दै उनले न्यायालयप्रति विश्वास व्यक्त गर्दै निष्पक्ष न्यायको अपेक्षा गरेका छन्।
सांसद जबराले चैत १५ को घटनालाई गम्भीर भन्दै त्यससम्बन्धी संसदीय छानबिन समिति गठन गर्न माग गरेका छन्।
यस्ता घटनामा निष्पक्ष छानबिन नहुने हो भने संसदको जिम्मेवारी के हो भन्ने प्रश्नसमेत उठाउँदै उनले दोषीमाथि कारबाही र निर्दोषको रिहाइ सुनिश्चित गरिनुपर्ने माग दोहोर्याए।
