खोज

सुर्खेत, ८ साउन ।

पछिल्ला पाँच वर्षमा कर्णाली प्रदेशमा डेंगु संक्रमण तीव्र गतिमा फैलिएको पाइएको छ। स्वास्थ्य सेवा निर्देशनालयका अनुसार आर्थिक वर्ष २०७७\०७८ मा ६ सय ३९ जना डेंगु संक्रमित भेटिएकोमा २०८१\०८२ मा यो संख्या बढेर १ हजार ८ सय ३७ पुगेको छ ।

साउन र भदौ महिनामा डेंगु संक्रमणको जोखिम अत्यधिक हुने भएकाले कर्णालीका १० वटै जिल्लामा राष्ट्रिय सचेतना अभियान सुरु गरिएको निर्देशनालयका सूचना अधिकारी पद्म केसीले जानकारी दिए ।

उनका अनुसार, लार्भा नष्ट गर्न र लामखुट्टेको वृद्धि नियन्त्रणका लागि ’खोज र नष्ट गर’ अभियान सञ्चालनमा ल्याइएको छ। शुक्रबार सामाजिक विकासमन्त्रीसहित सरोकारवाला निकायहरूसँग छलफल कार्यक्रम पनि तय गरिएको छ ।

यस्तै, कर्णालीमा डेंगुसँगै औलोको जोखिमसमेत बढ्न थालेको छ। विशेषगरी तराईमा सीमित देखिने औलो रोग अब हिमाली जिल्लाहरू—जस्तै हुम्ला, कालिकोट, दैलेख र सुर्खेत—मा समेत फैलिएको छ ।

२०७८\८२ को तथ्यांकअनुसार प्रदेशभर ३८ जना औलो संक्रमित भेटिए, जसमध्ये ३७ जना आयातित तथा १ जना स्थानीय संक्रमित थिए । हुम्लाको ताँजाकोट गाउँपालिका, दैलेखको आठबिसकोट, चामुण्डा, दुल्लु, सुर्खेतको वीरेन्द्रनगर, गुर्भाकोट, लेकबेसी, सिम्ता लगायतका पालिकाहरूमा औलोका बिरामी फेला परेका छन् ।

स्वास्थ्य सेवा निर्देशनालयका भेक्टर कन्ट्रोल सुपरभाइजर श्यामलाल आचार्यका अनुसार, लामखुट्टे यथेष्ट रूपमा फैलन थालेसँगै हिमाली भेगहरूमा औलो संक्रमणको सम्भावना बढेको छ । हुम्ला, कालिकोट, दैलेख, सुर्खेत औलो उच्च जोखिम जिल्लाका रुपमा रहेका छन ।