खोज

सल्यान, १५ मंसिर ।

सल्यानमा दुई छुट्टाछुट्टै योजनामा भ्रष्टाचार गरेको आरोपमा अख्तियार दुरुपयोग अनुसन्धान आयोगले १२ जना विरुद्ध मुद्दा दर्ता गराएको छ । जिल्लाको शारदा नगरपालिका वडा नम्बर १५ मा संचालन भएको सुन्दरडाँडा थाङ्नेखोला सडक निर्माण योजना र त्रिवेणी गाउँपालिका वडा नम्बर १ स्थित रिखेवगर, गैरीकटेरी, बाघमारे मोटरबाटो स्तरोन्नति योजनामा भ्रष्टाचार गरेको आरोपमा अख्तियारले विशेष अदालत काठमाडौंमा आरोपपत्र दायर गरेको हो । अख्तियार दुरुपयोग अनुसन्धान आयोग टंगालले प्रेस विज्ञप्ती मार्फत गराएको जानकारी अनुसार सहरी विकास तथा भवन निर्माण विभाग, डिभिजन कार्यालय दाङका तत्कालीन कार्यालय प्रमुख डिभिजनल इन्जिनियर राजेन्द्रप्रसाद पाण्डेसहित ६ जनाविरुद्ध भ्रष्टाचार मुद्दामा आरोपपत्र दायर गरिएको छ ।

आयोगले कार्यालय प्रमुख पाण्डेसहित तत्कालीन इन्जिनियर सन्तोषकुमार यादव, तत्कालीन सबइन्जिनियर नारायण ओली, रिखेबगर–गैरीकटेरी–बाघमारे दाङ सडक निर्माण उपभोक्ता समितिका अध्यक्ष मनबहादुर खत्री, कोषाध्यक्ष शोभाकुमारी खत्री र सचिव लालबहादुर केसीविरुद्ध ४३ लाख २२ हजार १५५ रुपियाँ ६६ पैसा भ्रष्टाचार गरेको आरोपमा बुधबार विशेष अदालत काठमाडौँमा आरोपपत्र दायर गरेको हो । आरोपपत्रमा बिगोबमोजिम जरिवाना गरी बिगोसमेत जफत गर्न माग गरिएको छ ।

सल्यानको त्रिवेणी गाउँपालिका–१ स्थित रिखेबगर–गैरीकटेरी–बाघमारे मोटरबाटो स्तरोन्नतिका लागि सहरी विकास तथा भवन निर्माण डिभिजन कार्यालय, दाङ घोराहीबाट रकम विनियोजन भएकोमा प्राविधिक र निर्माण समितिका अध्यक्षसमेतको मिलेमतोमा आफ्नो अनुकूल लगत परिवर्तन (इस्टिमेट चेन्ज) गरी भ्रष्टाचार गरेको देखिएको छ ।

अनुसन्धानको क्रममा तत्कालीन कार्यालय प्रमुख पाण्डे, इन्जिनियर यादव र सबइन्जिनियर ओलीसमेतले आर्थिक वर्ष २०७४÷७५ मा उपभोक्ता समितिसँग भएको सम्झौताविपरीत आफूलाई सजिलो पर्ने गरी निर्माण गरी मूल्याङ्कन बिल, नापी किताब तथा कार्य सम्पन्न प्रतिवेदन तयार गरी योजनाको स्वीकृत लागत अनुमानविपरीत उपभोक्ता समितिलाई बढी रकम ४३ लाख २२ हजार १५५ रुपियाँ ६६ पैसा भुक्तानी दिइएको पाइएको अख्तियारको विज्ञप्तिमा उल्लेख छ ।

यस्तै शारदा नगरपालिका वडा नम्बर १५ अन्तर्गत पूर्वाधार विकास कार्यालयबाट अनियमितता भएको आरोपमा त्यहाँका तत्कालीन निमित्त कार्यालय प्रमुख र अन्य कर्मचारी विरुद्ध पनि विशेष अदालतमा मुद्दा दायर गरिएको छ । आर्थिक वर्ष २०७७÷०७८ मा सडक निर्माण कार्यमा लागत अनुमान विपरीत कार्य गरी कागजमा सडक निर्माण भएको भनी देखाएको आरोपमा उनिहरु विरुद्ध मुद्दा दर्ता गरिएको अख्तियारले जनाएको छ ।

पूर्वाधार विकास कार्यालय सल्यानका तत्कालीन निमित्त प्रमुख इन्जिनियर विनोद पुन, सवइन्जिनियर प्रकाश शाही र कुमार बोहोराले सडक निर्माणमा नगरेको कामको समेत विवरण चढाई प्रतिवेदन तयार पारेको पाइएको छ । उनीहरू विरुद्ध आयोगले सात लाख १४ हजार ४१ बराबरको बिगो दाबी गरेको छ । सुन्दर डाँडा थाङनेखोला सडक निर्माण उपभोक्ता समितिका तत्कालीन अध्यक्ष कुलबहादुर बुढा, कोषाध्यक्ष नन्दकुमारी कँवर र सचिव मानदेव कँवर विरुद्ध पनि सात लाख १४ हजार ४१ बराबरको भ्रष्टाचार गरेको आरोप लागेको छ ।