खोज

नेपालगञ्ज, ३१ असार

बाँकेको कोहलपुरमा नक्कली नोट र लागुऔषधसहित दुई जनालाई प्रहरीले पक्राउ गरेको छ । पक्राउ पर्नेमा आफुलाई पत्रकारका रूपमा चिनाउने मनबहादुर सहकारी, जाजरकोटकी २२ वर्षीया ‎दिलमाया सिंह ठकुरी, जाजरकोटकै ३३ वर्षीय रामबहादुर सिंह, ३५ वर्षीय कृष्णबहादुर वली, ३८ वर्षीय प्रेमबहादुर बिक र रुकुम बाँफीकोटकी सपना पुन रहेका छन् ।
।

लागुऔषध नियन्त्रण ब्युरो नेपालगञ्ज र जिल्ला प्रहरी कार्यालय सुर्खेतबाट खटिएको संयुक्त टोलीले कोहलपुर–११ स्थित न्यूरोडमा रहेको जनगर्जन नेटवर्क प्रालि को शाखा कार्यालयबाट उनीहरूलाई पक्राउ गरेको हो । पक्राउ परेका मनबहादुर सहकारी कालिकोट नरहरीनाथ गाउँ पालिका ९ घर भई हाल कोहलपुर ११ बस्दै आएका छन् ।

उनले सञ्चालन गरेको कार्यालयकै कार्यकक्षबाट ५१ थान हजारका नक्कली नोट र १९ किलो ३२५ ग्राम अफिम बरामद भएको प्रहरीले जनाएको छ ।

साथै नक्कली नोट छाप्ने मेसिन, एक थान मोटरसाइकल र एक थान मोबाइल फोन पनि बरामद गरिएको छ । बाँके प्रहरीले दिएको जानकारीअनुसार, केही दिनअघि जिल्ला प्रहरी कार्यालय सुर्खेतले एक व्यक्तिलाई नक्कली नोटसहित पक्राउ गरेको थियो । प्रारम्भिक अनुसन्धानको क्रममा पक्राउ परेका व्यक्तिले कोहलपुरमा साथीसँग यस्ता अवैध गतिविधि भइरहेको भन्ने सूचना दिएपछि संयुक्त प्रहरी टोली कोहलपुरमा खटिएको हो ।

प्रहरीका अनुसार मनबहादुरले सञ्चालित संस्थाको आवरणमा गैरकानुनी गतिविधि सञ्चालन गर्दै आएको प्रारम्भिक अनुसन्धानबाट खुलेको छ । थप अनुसन्धान जारी रहेको र उनीहरूमाथि आवश्यक कानुनी प्रक्रिया अघि बढाइने प्रहरीले जनाएको छ ।