खोज

कपिलवस्तु, २७ असार ।

कपिलवस्तु नगरपालिकाको १८ औँ नगर सभाको दोस्रो बैठकले नगरको विकास निर्माणमा योगदान पुर्‍याएका दुई सञ्चारकर्मीलाई सम्मान गरेको छ । कपिलवस्तु नगरपालिकाको सभा हलमा आयोजित नगर सभाको दोस्रो बैठकमा जिल्लाका क्रियाशील सञ्चारकर्मी गुलाम अली र अजय साहनीलाई जनही २५ हजार नगद सहित सम्मानित गरिएको हो । नगर प्रमुख सुदिप पौडेल, उपप्रमुख सुनिता गुप्ता वैश्य, प्रमुख प्रशासकीय अधिकृत पुनाराम पौडेलले दुवै सञ्चारकर्मीलाई दोसल्ला ओढाएर सम्मान पत्र प्रदान गरिएको थियो । नगर सभाको दोस्रो बैठकले आर्थिक वर्ष २०८२/८३ को बिनीयोजन विधेयकलाई सर्वसम्मतिले पारित गरेको छ ।

सो अवसरमा बोल्दै कपिलवस्तु नगरपालिकाका प्रमुख सुदिप पौडेलले कपिलवस्तु नगरपालिका सहित बुद्धको जीवनी जोडिएका पाँच पालिकाले बुद्ध परिथपका लागी योजना निर्माण गरी कार्यक्रम अगाडी बढाएको बताए । पाँचै नगरको टोली अमेरिकाको टेक्सास राज्यमा पुगेका बेला सो राज्यले मार्च १३ को दिन लुम्बिनी एडभोकेसी डेका रूपमा बनाउने बिल पास गरेको र आगामी वर्ष देखी ट्क्सास राज्यमा लुम्बिनी एडभोकेसी डे मनाइने उनले जनाए । कपिलवस्तु नगरपालिकाले आगामी आर्थिक वर्षको नीति कार्यक्रममा पर्यटन प्रबद्र्धनलाई प्राथमिकता दिएको जनाउदै कपिलवस्तु नगरपालिकाले देवदह नगरपालिकाको सहकार्यमा आगामी आवमा सिद्धार्थ गौतमको विवाह उत्सव समेत मनाउन थालेको प्रमुख पौडेलले बताए । नगरमा आउने पर्यटकलाई आकर्षित गर्न बुद्ध र उनको परिवारको सदस्य र उनको जीवनी दर्शाउने मुर्तिहरु सडकका डिभाईडरमा राखेर बुद्धस्थलको झल्को दिने योजनाका साथ नगर अगाडी बढेको उनले स्पष्ट पारे ।

नगरको नीति तथा कार्यक्रममा नगर भित्रका ५२ सामुदायिक विद्यालय रहेको र सामुदायिक विद्यालयमा निःशुल्क शिक्षा यथावत् राखिएको, स्वास्थ्य बिमाको योगदान रकममा ५० प्रतिशत सह लगानी यथावत् रहेको, प्रत्येक वडामा महिनामा कम्तिमा २ पटक एमबिबीएस डाक्टर सहित मोबाईल क्लिनिकको स्वास्थ्य सेवा प्रदान गरिने र क्निलिकले ६० वर्ष माथिका नागरिकलाई निःशुल्क परीक्षण र गर्भवती महिलाको निःशुल्क भिडिया एक्सरे सेवा दिने, बिरामीलाई निःशुल्क रगत र सर्प दंशको उपचार निःशुल्क, सरसफाईको कार्यक्रम गाउँस्तरमा पुर्याउने र फोहर गर्नेलाई कारबाहीको व्यवस्था गर्ने, छाडा चौपाया व्यवस्थापनलाई प्राथमिकतामा राख्ने, गरिब असहाय र गर्भवतीलाई निःशुल्क एम्बुलेन्सको सेवा प्रदान गर्ने, छाडा चौपाया नियन्त्रण गर्न चौपाया तथ्याकं तयार पारि ट्राकिगं गर्ने र प्रत्येक वडामा १ वटा हाईम्याक्स लाईट जडान गर्ने योजना रहेको प्रमुख पौडेलले बताए ।

रामघाटमा शिवधाम निर्माण, टोल विकास समिति गठन गरी सरसफाईका कार्यक्रम, वडास्तरीय खेल प्रतियोगिता सञ्चालन र खेलाडीलाई प्रोत्साहन गर्न र आगामी आवमा लिजामा सुधार गर्न तत्परताका साथ नगरले भूमिका खेल्ने उनको भनाई थियो । नगरको विकास योजनालाई वडाले सहकार्य र सहयोग गर्ने वडा नम्बर ३ का अध्यक्ष प्रकाश गैरेले बताए । लिजामा अङ्क सुधार गर्न सबै पक्ष लाग्नु पर्नेमा गैरेले जोड दिए ।