खोज

गुल्मी, २५ असार ।

गए रातीदेखि परेको अविरल वर्षाका कारण गुल्मीको रिडी–वामीटक्सार र कालीगण्डकी करिडोर अन्र्तगत रिडी–पुर्तीघाट सडक अवरुद्ध बनेको छ ।

रिडी–वामीटक्सार सडकखण्ड अन्र्तगत सत्यवती गाउँपालिका –६ स्थित डहरे खोलामा पानीको बहाव बढेपछि आज बिहानदेखि उक्त सडक पूर्ण रुपमा अवरुद्ध बनेको जिल्ला प्रहरी कार्यालय गुल्मीका सूचना अधिकरी एवं प्रहरी नायव उपरिक्षक गंगाबहादुर सारुले जानकारी दिएका छन ।

त्यसैगरी कालीगण्डकी करिडोर सडक अन्र्तगत कालीगण्डकी गाउँपालिका –१ स्थित गरगरेमा सडक माथिबाट पहिरो खसेपछि आज बिहान ७ वजेदेखि उक्त सडक पनि पुर्णरुपमा अवरुद्ध बनेको प्रहरीले जनाएको छ ।

सडक अवरुद्ध बनेपछि त्यस क्षेत्रबाट पाल्पा, बुटवल, पर्वत र वाग्लुङ्सम्म चल्ने सवारी साधनहरु बिच बाटोमा अलपत्र परेका छन । सडक सुचारु गर्नका लागि अहिले ईलाका प्रहरी कार्यालय जोहाङ्ग खैरेनी र पुर्तीघाटबाट प्रहरी टोली बाढी र पहिरो ग्रस्त क्षेत्रमा खटिएको प्रहरी नायव उपरिक्षक सारुले बताए । खोलामा पानीको बहाव बढ्दै गएको र सडक माथिबाट पनि पहिरो झर्नेक्रम नरोकिएकोले अवरुद्ध सडक सञ्चालन गर्न समस्या परेको बताईएको छ ।

कालीगण्डकी करिडोर अन्र्तगत गुल्मी खण्डमा वर्षाका कारण धेरै ठाउँमा सडक अवरुद्ध बनेको कालीगण्डकी गाउँपालिका अध्यक्ष बेदबहादुर थापाले बताउनुभयो । वर्षादले जिल्लाका दुई दर्जन भन्दा धेरै ग्रामिण सडकहरु समेत अवरुद्ध बनेका छन ।

जिल्ला प्रशासन कार्यालय गुल्मीले वर्षादको समयमा खोला टटीय क्षेत्रका वासिन्दाहरुलाई सर्तकता अपनाउँदै सुरक्षित स्थानमा वसोवास गर्न आग्रह गरेको छ । प्रशासनले अत्यावस्यक काम बाहेक कोही पनि घरबाट यात्रामा ननिस्कन सूचित गरेको छ ।