खोज

सुर्खेत,२३ असार । 

सुर्खेत जिल्ला भित्रका सम्पूर्ण सरकारी तथा गैरसरकारी स्वास्थ्य संस्थाका बहिरङ्ग सेवा (ओपिडी) बन्द गरेका छन् । नेपाल चिकित्सक सङ्घ केन्द्रीय घोषित आन्दोलनलाई समर्थन गर्दै नेपाल चिकित्सक सङ्घ सुर्खेत शाखाले बन्द गरेको हो । सङ्घको आन्दोलनप्रति समर्थन जनाउँदै सुर्खेतस्थित कर्णाली प्रदेश अस्पताल तथा अन्य स्वास्थ्य संस्थाहरूमा ओपिडी सेवा बन्द गरिएको हो ।
उपभोक्ता अदालतले चिकित्सकीय अभ्याससम्बन्धी मुद्दामा गरेको कारबाहीको निर्णयप्रति असहमति जनाउँदै अस्पताल तथा स्वास्थ्य संस्थामा आकस्मिक बाहेकका सम्पूर्ण सेवा बन्द गरेको कर्णाली प्रदेश अस्पतालका सूचना अधिकारी विनोद बस्नेतले जानकारी दिए ।  आम नागरिकलाई असुविधा नहोस् भन्ने चाहना भएता पनि स्वास्थ्यकर्मीहरूको सुरक्षाको सुनिश्चितता नगरी यस्ता घटनाहरू दोहोरिन नदिनतर्फ सबैले गम्भीर ध्यान दिन जरुरी रहेको चिकित्सकहरूको भनाई छ ।

सम्बन्धित निकायलाई तत्काल गम्भीर ध्यानाकर्षण गराउँदै चिकित्सक तथा स्वास्थ्यकर्मीको सुरक्षाका लागि आवश्यक नीति तथा कानुनी संरचना तत्काल कार्यान्वयन गर्नुपर्ने उनीहरूको माग छ । सम्पूर्ण सरकारी तथा निजी अस्पताल, पोलिक्लिनिक, अफिन, नेपाल नर्सिङ सङ्घ, नेपाल स्वास्थ्यकर्मी सङ्घ युनियन, सम्पूर्ण फेसागत स्वास्थ्यकर्मीन्यूहरु, सम्पूर्ण क्लिनिकहरूलाई ऐक्यबद्धता जनाउँदै आन्दोलनमा सहभागिता हुन चिकित्सक सङ्घले आग्रह गरेको छ ।