खोज

काठमाडौं ।

सोमबार सेयर बजारको परिसूचक नेप्से ९.१९ अंकले वृद्धि भई २६३१ मा पुगेको छ। सूचकमा हरियाली देखिए पनि समग्र कारोबार रकम भने अघिल्लो दिनको तुलनामा घटेको छ।

नेपाल स्टक एक्सचेन्जका अनुसार अघिल्लो दिन ७ अर्ब १२ करोड रुपैयाँको कारोबार भएकोमा आज कारोबार ६ अर्ब ३८ करोड रुपैयाँमा खुम्चिएको हो। आज कुल १४५ कम्पनीको सेयर मूल्य बढ्दा १०३ कम्पनीको घटेको देखिएको छ।

बजारमा उत्पादन तथा प्रशोधन समूह सबैभन्दा धेरै १.६३ प्रतिशतले बढ्यो। त्यसैगरी बैंकिङ ०.३८, विकास बैंक ०.७२, लगानी ०.०२, जीवन बीमा ०.८२, माइक्रोफाइनान्स ०.९२, निर्जीवन बीमा ०.६१ र व्यापार समूह ०.७२ प्रतिशतले बढेका छन्।

त्यसैबेला फाइनान्स समूह ०.०६, होटल तथा पर्यटन ०.०३, हाइड्रोपावर ०.२८ र अन्य समूह ०.३६ प्रतिशतले घटेका छन्।

कम्पनीगत हिसाबले हेर्दा राप्ती हाइड्रो एण्ड जनरल कन्स्ट्रक्सनको मूल्य करिब १० प्रतिशतले बढेको छ। धौलागिरि लघुवित्तको ९.८०, विन नेपाल लघुवित्तको ९.१६, सिन्धु विकास बैंकको ७.८१ र सप्तकोशी विकास बैंकको ७.२१ प्रतिशतले मूल्य बढेको छ।

उता, पन्चकन्या माइ हाइड्रोको सेयर मूल्य सबैभन्दा धेरै ४.९२ प्रतिशतले घटेको छ। ग्रिन डेभलपमेन्ट बैंक ४.६५, पिपुल्स हाइड्रोपावर ३.७५, पाँचथर पावर ३.४९ र कालिका पावरको मूल्य ३.४२ प्रतिशतले घटेको छ।

आज धेरै कारोबार भएका कम्पनीहरूमा साहस ऊर्जा, सानिमा माइ हाइड्रोपावर, बुटवल पावर, सप्तकोशी विकास बैंक र एनआरएन इन्फ्रास्ट्रक्चर अग्रपंक्तिमा छन्।