खोज

सुर्खेत,१० असार ।

कर्णाली प्रदेश अस्पतालका लेखा अधिकृतसहित तीन जना विरुद्ध अदालतमा मुद्दा दायर भएको छ ।सार्वजनिक सम्पत्ति हानी नोक्सानी गरेको आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको हो ।

अस्पतालका लेखा अधिकृत शंकरप्रसाद सुवेदी, सामाजिक सेवा एकाइ कार्यक्रमतर्फ कम्प्युटर अपरेटर तृप्ति शाही र कुमारी बैङ्कका एक्सटेन्सन काउन्टरका तत्कालीन प्रमुख गोमा सिंजाली मगर विरुद्ध मुद्दा दायर गरेको अख्तियार दुरुपयोग अनुसन्धान आयोगले जनाएको छ ।

स्वास्थ्य बिमा शाखाको नाम दर्ता गर्ने काउन्टरमा खटिई बिमितहरुको नाम दर्ता गर्ने कार्य गर्दै आइरहेकोमा तिनीहरूले अनधिकृत रूपमा बिलिङ काउन्टरमा प्रवेश गरी बिलिङ गर्ने गरेको र बिलिङबाट प्राप्त रकम बैंक दाखिला नगरी रकम हिनामिना गरि अनियमितता गरेको आयोगले जनाएको छ ।

अस्पतालमा २०८० साउन एक देखि  साउन २०८१ साउन ३२ सम्मको अवधिमा सङ्कलन भएको राजस्व रकम ३४ लाख तीन हजार आठ सय छपन्न रुपैयाँ पचास पैसा सङ्कलन भएको थियो । उक्त रकममध्ये आठ लाख ३६ हजार तीन सय तीस रुपैयाँ रकम अस्पतालको खातामा दाखिला गरिएको र २५ लाख ६७ हजार पाँच सय २६ रुपैयाँ रकम हिनामिना गरेको अख्तियार दुरुपयोग अनुसन्धान आयोगका प्रवक्ता राजेन्द्रकुमार पौडेल जानकारी दिए । उनीहरूलाई भ्रष्टाचार निवारण ऐन २०५९ को दफा १७ बमोजिमको कसुर गरेको ठहर गरि विशेष अदालतमा आरोप पत्र दायर भएको पौडेलले जनाए ।