खोज

नवलपरासी ,पश्चिम  ।

नियमित ध्यान र साधनाले स्वस्थ रहनसँगै तनाव व्यवस्थापनमा सहयोग गर्ने भएपछि पछिल्लो समय बर्दघाटमा योग अभ्यासप्रति आकर्षण बढ्दै गएको छ । योग अभ्यास र साधनाले शारीरिक मानसिक स्वास्थ्य राख्नका लागि सकारात्मक सोचको विकास गर्न सहयोग गर्ने भएपछि युवादेखि वृद्ध वृद्धासम्म योग तर्फ आकर्षित भएका छन् ।

मानिसको व्यस्त जीवनमा साधारण व्यायाम गरेर आफूलाई शारीरिक रूपमा स्वस्थ राख्नसँगै तनाव व्यवस्थापनमा सहयोग गर्ने भएपछि विगत ७ वर्ष वर्षदेखि पतञ्जलि योग समिति त्रिनेत्र धाम जिनिरेभारले योग अभ्यास सिकाउँदै आएको योग गुरु नरेश पङ्गेनीले बताए ।

बर्दघाट नगरपालिकाको सहयोग ,त्रिनेत्र ज्येष्ठ नागरिक दिवा सेवा केन्द्र को आयोजना , पतञ्जलि योग समिति त्रिनेत्र धाम जिमिरेभार को सहकार्य ५ दिने निःशुल्क वृहत् योग विज्ञान शिविर को आज अन्तर्राष्ट्रिय योग दिवसको अवसर पारी समापन गरिएको छ । शिविरमा उल्लेख सहभागिता रहेको थियो ।

बर्दघाट नगरपालिकामा पछिल्लो समय योगको महत्त्व बढेपछि यति बेला सिङ्गो नगर नै योगमय हुँदै गएको छ ।

नियमित योग अभ्यासले अहिले शरीरलाई अर्कै ऊर्जा थपिएको र सबैलाई योग गर्न सुझाव छ बर्दघाट १४ का स्थानीय माधव तिवारीको। बर्दघाट नगरपालिकालाई स्वास्थ्य नगर बनाउने उद्देश्य अनुरूप नगरपालिकाले योगका निम्ति पनि बजेट विनियोजन गरिरहेको नगरप्रमुख शम्भुलाल श्रेष्ठले बताए ।

बिहानको समयलाई योग र साधनामा लगाउँदा शारीरिक तथा मानसिक रूपमा स्वस्थ रहन सहयोग पुग्ने गरेको भन्दै नगर प्रमुख श्रेष्ठले भने, ‘‘दिनभर आफ्नो काम गरे पनि बिहान केही समय व्यक्तिगत स्वास्थ्यका लागि दिनुपर्छ भन्ने महसुस भएको छ त्यसैले सबैलाई योगमा जोडिन आग्रह गर्छु  ।

नियमित ध्यान र योग गर्नाले शारीरिक स्वास्थ्य र फुर्तिलो बनाउन सहयोग गर्दछ ।’योग र ध्यानले शारीरिक स्फूर्ति सँगै सकारात्मक सोचको विकासमा मद्दत पुग्ने उपप्रमुख रुद्र प्रकाश उपाध्यायले बताए ।

पछिल्लो समय खानपान र जीवनशैलीका कारण प्राय मानिसहरूको शरीर भद्दा हुने, अस्तव्यस्त र अस्वस्थ रहने भएकाले आसन, प्राणायाम र उचित खानपानको माध्यमबाट स्वस्थ रहन योगले सहयोग गर्ने योग साधकहरूका भनाई छ । बदलिँदो जीवनशैली, खानपान, तनाव, कुलतबाट बच्नको लागि समेत योग आवश्यक रहेको देखिन्छ ।

अहिले बर्दघाटका विभिन्न स्थानहरूमा नियमित योग शिविर हरू सञ्चालन हुने गरेका छन् भने योग समितिहरू गठन गरी सबैलाई योग प्रति जोड्ने गरिएको छ ।