खोज

बुटवल, ५ असार । नेपाल बैंकर्स एशोसिएसन (एनबीए) लुम्बिनी प्रदेश समितिको आयोजनामा रुपन्देहीमा प्रदेशस्तरीय विशेष छलफल कार्यक्रम सम्पन्न भएको छ । कार्यक्रममा लुम्बिनी प्रदेशका सबैजसो वाणिज्य बैंकका प्रमुख तथा नेपाल राष्ट्र बैंक सिद्धार्थनगर कार्यालयका पदाधिकारीहरुको उपस्थिति रहेको थियो ।

कार्यक्रममा एनबीए लुम्बिनी प्रदेश समितिका संयोजक तथा नेपाल बैंक लिमिटेडका प्रमुख अर्जुनबहादुर कँडेलले आगामी मौद्रिक नीति २०८२/८३ का लागि आवश्यक सुझाव संकलन गर्नु र वर्तमान बैंकिङ प्रणालीका ज्वलन्त समस्याहरूमा समाधान खोज्ने उद्देश्यसहित अन्तरक्रिया कार्यक्रम गरिएको बताए । संयोजक कँडेलले पछिल्लो १० महिनामा करिब ४ सय अर्ब रुपैयाँ निक्षेप संकलन भएको भए पनि कर्जा विस्तार ३६८ अर्बमा सीमित रहेको बताए । “विगतमा गरिएको इजी मनि नीतिले अहिलेको समस्यालाई जन्म दिएको हो । अब मौद्रिक नीतिमा पुनः संरचना तथा पुनः तालिकाकरणमा सहजता हुनु आवश्यक छ ।” उनले भने ।

बजारमा तरलताको अभाव, ऋणको माग अत्यन्त न्यून हुनु, बैंकहरूको आम्दानी घट्नु र कर्जा विस्तार लक्ष्य (१२.५%) नपुग्नु, खराब कर्जा वृद्धि (हाल ३% हाराहारीमा), डिजिटल बैंकिङको स्पष्ट अवधारणा आवश्यक, एसेट म्यानेजमेन्ट कम्पनीको अवधारणा, सब्सिडाइज ऋणलाई नियमन, एलबिएमा नीतिगत समस्या, क्रेडिट कन्सन्ट्रेसन र व्यवसायी–बैंकर सम्बन्धमा स्पष्ट नीति लगायत विषयमा छलफल भएका थिए ।

कार्यक्रममा सहभागी नेपाल बैंक लिमिटेड (संयोजक) अर्जुनबहादुर कँडेल, प्राइम बैंकका कुश सूदन सिंह, नबिल बैंकका अमित केसी, कुमारी बैंकका चेतकान्त बन्जाडे, राष्ट्रिय वाणिज्य बैंकका गणेश पौडेल, सिटिजन्स बैंकका प्रदीपकुमार श्रेष्ठ, ग्लोबल आईएमई बैकमा शान्ता सिवाकोटी लगायत लुम्बिनी प्रदेशका वाणिज्य बैकमा प्रमुखहरुले डिजिटल बैंकिङ, पुनर्संरचना, फाइनान्सियल लिटेरेसी, सब्सिडी लोन नियमन, डाईरेक्टि सेक्टर लोन, वर्किङ क्यापिटल गाईडलाईन, जोखिम भारमा वृद्धि, कर्जा बिस्तारमा संकुचन जस्ता विषयमा महत्वपूर्ण सुझावहरु दिएका थिए ।

कार्यक्रममा नेपाल राष्ट्र बैकका निमित्त कार्यालय प्रमुख तथा डिपुटी डाईरेक्टर जिवन प्रकाश पाण्डे लगायत अन्य सहभागीहरुले महत्वपूर्ण राय ब्यक्त गरेका थिए । छलफलबाट संकलित सुझावहरू असार १० भित्र राष्ट्र बैंकमा पठाइने बताइएको छ ।