नवलपरासी पश्चिम् ।
बिपन्न नागरिकलाई लक्षित गरी पश्चिम नवलपरासीको बर्दघाट नगरपालिका प्राङ्गणमा कपडा बैंक स्थापना गरिएको छ।
बर्दघाट जेसिज र क्लोथ एण्ड फुड बैंक नेपालको संयुक्त आयोजनामा कपडा बैंकको स्थापना गरिएको हो।
हुम्ला जुम्ला लगायत ग्रामीण दुरदराजका बस्तीमा गरी देशका विभिन्न भागमा १६५ स्थानिय तहमा क्लोथ एण्ड फुड बैंक स्थापना गरिएको अध्यक्ष कमल जिसिले जानकारी दिनुभयो ।बार्षिक रुपमा दुई करोड मूल्य बराबरका ३२ देखि ४० टन लुगा संकलन गरिएको जिसिले बताए ।
कपडा बैंकको उद्घाटन गर्दै बर्दघाट नगरपालिकाका प्रमुख शम्भुलाल श्रेष्ठले पुराना कपडालाई प्रसोधन गरेर पुनः प्रयोग गर्न मिल्नेगरी कपडा बैंंकको स्थापना गरिएको बताउनुभयो । उहाँले यो अभियानमा सबैले साथ दिन आग्रह गर्दै आगामी दिनमा फुड बैंक समेत बिस्तार गर्दै लगिने बताए।”हाम्रो सानो सहयोगले पनि अरुलाई ठूलो खुसी मिल्छ,बिकास निर्माण भनेर मात्रै हुदैन मानविय धर्म पनि हामिले बिर्सनु हुँदैन”नगरप्रमुख श्रेष्ठले भने ।हुनेले नहुनेलाई सहयोग गर्नु नै मानवीयता भएकाले कपडा बैंकलाई सबैले सहयोग गर्ने नगर प्रमुख श्रेष्ठले आग्रह गरे ।
बर्दघाट नगरपालिकाको आर्थिक सहयोगमा स्थापना भएको कपडा बैंकमा कपडा संकलन गरेर नगर भित्रका विपन्न नागरिक र तत्कालै आवश्यक पर्ने स्थानमा वितरण गरीने र थप स्थानमा बैंक स्थापना गर्दै लगिने बर्दघाट जेसिसका अध्यक्ष मोहन सापकोटाले बताए।बर्दघाट नगरपालिकाले बिगतका बर्षहरुका जाडो याममा समेत बिपन्न समुदायमा लत्ता कपडा बितरण गरेको थियो ।
२८ मंसिर २०८२, आइतबार
