खोज

बुटवल, ०३ असार ।

लायन्स क्लब अफ बुटवल सयपत्री कार्यदक्षता र सेवा भावका आधारमा सर्वोत्कृष्ट क्लब २०२४/०२५ को उपाधि प्राप्त गर्न सफल भएको छ ।  लायन्स इन्टरनेशनल डिष्ट्रिक्ट ३२५ पी को चौथो डिष्ट्रिक्ट क्याबिनेट बैठक तथा सम्मान समारोहमा क्लबलाई सम्मान गरिएको हो । आयोजकका अनुसार डिष्ट्रिक्ट ३२५ पी अन्तर्गतका १५५ क्लबहरू मध्ये प्रतिस्पर्धात्मक मूल्याङ्कनको आधारमा बुटवल सयपत्री क्लबलाई उत्कृष्ट क्लबका रूपमा छानिएको हो । साथै, क्लबकी अध्यक्ष लायन कमला बस्नेत कुँवरलाई पनि सर्वोत्कृष्ट क्लब अध्यक्ष २०२४/२५ को उपाधिसहित सम्मान गरिएको छ ।

कुँवरको समर्पित नेतृत्व, सदस्य विस्तार र सामाजिक उत्तरदायित्वमा देखाइएको अग्रसरतालाई उच्च मूल्याङ्कन गरिएको हो । लायन्स क्लब अफ बुटवल सयपत्री वर्ष २०२४/२५ को सर्वोत्कृष्ट क्लब, वर्ष २०२४/२५ की सर्वोत्कृष्ट क्लब अध्यक्ष, सर्वाधिक सदस्य वृद्धि गरेको क्लब, सर्वाधिक सदस्य वृद्धि गराउने अध्यक्ष, शीर्ष दस उत्कृष्ट क्लब मध्ये एक, शीर्ष दस क्लब अध्यक्षमध्ये एक, एरिया ४ को सबैभन्दा बढी सहभागिता गराएको क्लब लगायतका पुरस्कारबाट सम्मानित भएको छ ।

उक्त समारोहमा अध्यक्ष कमला बस्नेत कुँवरलाई लायन्स इन्टरनेशनलका अन्तर्राष्ट्रिय अध्यक्षबाट प्रदान गरिने प्रशंसा पत्रबाट समेत सम्मानित गरिएको छ । यो सम्मान लायन्सको ध्येय प्राप्तिमा उनले पु¥याएको विशिष्ट योगदानको कदर स्वरूप प्रदान गरिएको हो ।

“यी सम्मान र पुरस्कारहरू सेवामा समर्पण, नेतृत्वमा अनुकरणीयता, र सामाजिक उत्तरदायित्वप्रतिको गहिरो प्रतिबद्धताको प्रमाण हुन् । हामी आगामी दिनहरूमा अझ सशक्त रूपमा समाजको सेवा गर्ने प्रतिबद्धताका साथ अघि बढ्नेछौँ ।” क्लब अध्यक्ष लायन कमला बस्नेत कुँवरले भनिन् । लायन्स क्लब अफ बुटवल सयपत्रीले ‘हामी सहयोग गर्छौँ’ भन्ने लायन्सको नारालाई आत्मसात् गर्दै बुटवल तथा वरपरका समुदायमा सामाजिक परिवर्तन ल्याउने उद्देश्यले विविध परियोजनाहरू सञ्चालन गरिरहेको छ । क्लबले भविष्यमा पनि सकारात्मक प्रभाव पार्ने कार्यक्रमहरूलाई निरन्तरता दिने बताएको छ ।