खोज

नेपाल विद्युत् प्राधिकरण भन्छ– नेपालमा लोडसेडिङ छैन । तर, यता उपभोक्ता भने छिनमा आउने र छिनमै जाने बिजुलीदेखि वाक्क भैसकेका छन् । अहिले पश्चिम तराईमा व्यापक गर्मी छ । यही बेला बिजुली कति बेला आउँछ र कति बेला जान्छ कुनै पत्तो हुँदैन । खासगरि साँझ र रातीको बेला झ्यापझ्याप बिजुली जाने समस्याले आम सर्वसाधारण दिक्क भैसकेका छन् । विद्युत् प्राधिकरण ट्रिपिङ र लो भोल्टेजको समस्या रहेको दाबी गर्छ । यता बढ्दो गर्मीले जनजीवन आक्रान्त बनेको छ । छिनैभरमा आउने र जाने (विद्युत् ट्रिपिङ) समस्याले स्थानीयले ठुलो सास्ती भोग्नु परेको छ । उपभोक्ता भन्छन्– नेपाल विद्युत् प्राधिकरणको कार्यकारी निर्देशकबाट कुलमान घिसिङलाई हटाए पनि समस्या चर्केर गएको छ । निश्चित रूपमा उपभोक्ताको आशङ्कामा बल पुग्ने काम भएको छ ।

कुलमान निष्कासनमा पर्ने बित्तिकै विद्युत् अनियमित हुन थालेको हो । एकातिर जेठको चर्को र उखरमाउलो गर्मी र अर्कोतिर विद्युतको अनियमितताले जनजीवनमा ठुलो असर परेको छ । बिजुली आउने जाने समस्याले उपभोक्तालाई हैरान त बनाएको छ नै विद्युतीय उपकरण बिग्रने जोखिम पनि बढाएको छ । विद्युत् प्राधिकरणले भने समस्या समाधानमा ध्यान दिएको छैन । विडम्बना के छ भने वर्षा लागेपछि विद्युत् उत्पादन बढेको भन्दै नेपाल विद्युत् प्राधिकरणले भारततर्फ बिजुली निर्यात गर्न थाल्छ तर नेपालका उपभोक्ताले पाएको सास्तीको भने ख्यालै छैन । अहिले नेपाल विद्युत् प्राधिकरणकै लापरबाहीका कारण विद्युत् आपूर्ति अनियमित भएको यथार्थ हो । विद्युत् आपूर्तिमा देखिएको अनियमितताको प्रकृति हेर्दा वितरणमा प्रयोग भएका कमसल उपकरण यसको कारक हुन । किनभने विद्युत् प्राधिकरणले हरेक वर्ष ट्रान्सफरमर परिवर्तन गरेको छ तर समस्या ज्यूँकात्यूँ छ ।

मौसमबीदहरूले यो वर्ष अधिक गर्मी हुने बताई रहँदा नेपाल विद्युत् प्राधिकरणले उपभोक्तालाई राहत दिनेतर्फ समयमै चासो समेत दिएको छैन । त्यसै पनि तराईमा यो वर्ष अधिक गर्मीको महसुस गरिएको छ । त्यसमाथि यही वर्ष विद्युत् प्राधिकरणले लाइन आउने जाने समस्या बढायो । जनमानसमा विद्युत् प्राधिकरणमाथि गम्भीर आरोप पनि लाग्दै आएको छ । एसी, इन्भर्टर लगायतका उपकरणको विक्री बढाएर प्राधिकरणका कर्मचारीले कमिसन खाने चक्करमा छिन छिनमा विद्युत् कटौती गरी जनतालाई दुःख दिने गरेको गुनासो छ । यो गुनासो अहिलेको मात्र होइन वर्षौँदेखि नेपाली जनताले गर्दै आएका छन् तर नेपाल विद्युत् प्राधिकरण यो विषयमा जवाफविहीन बन्दै आएको छ । विद्युत् प्राधिकरणले विद्युत् कटौती गर्ने नै हो भने लोडसेडिङको घोषणा गरोस् ।

कार्य तालिका नै निकालेर विद्युत् कटौती होस् । विना जानकारी उपभोक्तामाथि विद्युत् कटौती थोपर्नु न्यायसङ्गत होइन । यदि उपकरणमा सुधार र सुदृढीकरण गर्नुपर्ने भए तत्काल गर्नुपर्दछ । अरू कारणले आपूर्तिमा गडबडी भएको भए त्यसको जानकारी दिन सक्नुपर्दछ । तर, विद्युत् प्राधिकरण पारदर्शी बन्न सकेको छैन । उपभोक्ताले विना सूचना लाइन काटिँदा समस्या परेको बत्ताइरहेका छन् । त्यसकै कारण विद्युतीय उपकरण बिग्रने समस्या बढेको छ भने बालबालिका बिरामी पर्ने समस्याका साथै साँझमा बिजुली जाँदा बालबालिकालाई पढ्न समेत समस्या परेको छ ।

वृद्ध वृद्धालाई रात काटन समस्या परिरहेको छ । विद्युत् प्राधिकरणका लागि यो सामान्य विषय होला तर आम जनताका लागि यो गम्भीर समस्या हो । त्यसैले विद्युत् प्राधिकरणले लोडसेडिङ तालिका सार्वजनिक गर्न लाज मानेको हो भने अर्कै कुरा, होइन भने आम उपभोक्तालाई गुमराहमा राखेर, पूर्व जानकारी नदिई लाइन काट्नु गम्भीर लापरबाही हो । अहिलेको उखरमाउलो गर्मीले आम उपभोक्ता समस्यामा परिरहेको अवस्थामा कम्तीमा बिजुली नजाने व्यवस्थातर्फ ध्यान जाओस् । कुलमान घिसिङ नभए पनि फरक पर्दैन भन्ने सरकारले उनी हट्ने बित्तिकै किन विद्युत् कटौती गरिरहेको छ ? जनताले प्रश्न गरिरहेका छन् ।