खोज

बाँके, २३ जेठ ।

नेपालगन्ज उपमहानगरपालिकाले अत्यधिक गर्मीको कारण एक साता गर्मी बिदा दिएको छ । नगर भित्रका सबै विद्यालयमा एक हप्ताको लागि बिदा दिने निर्णय गरेको छ । आइतबार (२६ जेठ) देखि लागू हुने गरी शुक्रबार (३१ जेठ) सम्म विद्यालय बन्द रहने सूचनामा जनाइएको छ ।

वरिष्ठ शिक्षा अधिकृत लोकेन्द्र बहादुर शाहीद्वारा हस्ताक्षरित सूचनामा हालको तीव्र तापक्रमले विद्यार्थीको स्वास्थ्यमा प्रतिकूल असर पर्न सक्ने भएकाले सावधानी स्वरूप एक हप्ते गर्मी बिदा दिने निर्णय गरिएको उल्लेख छ ।

सूचनामा एक हप्तापछि मौसमको अवस्था हेरी विद्यालय खोल्ने वा नखोल्ने निर्णय पुनः जानकारी गराइने पनि उल्लेख गरिएको छ । गर्मीको चपेटामा परेका तराई क्षेत्रका अन्य जिल्लाहरूमा पनि यस्तै निर्णय हुने क्रम जारी छ ।

स्थानीय अभिभावक र शिक्षकहरूले उपमहानगरपालिकाको निर्णयको स्वागत गरेका छन् । अत्यधिक गर्मीका कारण बालबालिकाको स्वास्थ्यमा असर पर्ने सम्भावना रहेकाले विद्यालय बन्द गर्नु उपयुक्त निर्णय भएको उनीहरूको भनाइ छ ।

गर्मी बढेसँगै घरमै रहने विद्यार्थीहरूलाई पर्याप्त पानी पिउन, चिसो स्थानमा बस्न, र धूपमा ननिस्कन नेपालगन्ज उपमहानगरपालिकाका स्वास्थ्य  शाखा प्रमुख राम बहादुर चन्दले सुझाव समेत दिए ।