खोज

दाङ, १७ जेठ ।

दंगीशरण गाउँपालिका वडा नम्वर –६ बागरकी गृहिणी बुधनी चौधरीलाई घरको आँगनमा खानेपानीको धारा निर्माण भएपछि दैनिक उपभोग गर्न र गाईवस्तुलाई खुवाउन निकै सजिलो भएको छ । ‘एक घर, एक धारा’ अभियान अन्तर्गत गाउँमा एक वर्षअघि निर्माण सम्पन्न भएको खानेपानी योजनाका कारण पानीको सुविधा भएको हो । उनले भनिन्, “खानेपानीका लागि गाउँभरीमा एउटा इनार थियो, पानी थाप्दा कहिलेकाहीँ त तँछाड मछाड भएर झगडा हुन्थ्यो । घरमा नयाँ धारा बनेसँगै अब भने समस्या सधैँलाई समाधान भएको छ ।” गर्मी मौसममा खानेपानीको मुहान सुक्ने र खानेपानीको लागि गाग्री बोकेर खोला–खोला हिँडेर सास्ती हटेको उनले सुनाइन् । पानीका कारण घरमा पनि झगडा हुने गरेको थियो, पानीको लाइनमा बस्दा समय धेरै जाने घरका मानिसले धेरै समय लाइस् भनेर गाली गर्ने गरेकोको उनले नमिठो पलको स्मरण गरिन् । अहिले घरपरिवार पनि शान्त छ ।

दंगीशरण गाउँपालिका –६ बागरकी जया चौधरीलाई एक वर्ष अघिसम्म गाउँको साझा इनारमा पानीको लागि लाइन बस्नुपथ्र्यो । त्यही इनार पनि चैत, वैशाखको खडेरीमा सुक्ने गथ्र्यो । आधा घन्टा लाइनमा बसेर दुईवटा गाग्रीमा पानी एकैपटक ल्याउनुपर्ने बाध्यता थियो । बिहान चार बजेदेखि लाइनमा बसेर पानी भर्ने गरेको उनलाई अझै सम्झना छ । अहिले उनको दैनिकी फेरिएको छ । घर छेउँमा बनेको खानेपानीको बोरिङबाट घरघरमा पानी आउन थालेपछि उनी धेरै खुशी भएकी छन् । उनले धाराको पानी प्रयोग गर्न थालेपछि समयको बचत भएको छ । करेसाबारीमा तरकारी खेती गरेर घरमा खान पुग्ने तरकारी फलाएकी छन् ।
पानीको लागि बिहानभरको समय खेर जाने गरेको थियो । समय बचत भएको छ ।

दंगीशरण गाउपालिका वडा नम्वर –६ बागर खानेपानी उपभोक्ता समितिका अध्यक्ष रेशम वलीले खानेपानी तथा सरसफाई डिभिजन कार्यालय दाङको सहयोग र स्थानीयको जनसहभागितामा बोरिङ खनेर पाइप बिस्तार गरी घरघरमा पानीका धारा वितरण गरिएको बताए । दैनिक दुई घण्टा पानी वितरण गरिए पनि पानी भण्डारण गर्ने ट्याङ्की नहँुदा समस्या भएको उनको भनाइ छ । दुई सय घरले पानीका लागि निवेदन दर्ता गरेका छन् तर अहिले एक सय ८६ घरधुरीले पानीको सुविधा लिइरहेका छन् । अरु प्रकृयामा छन् । पानी जति प्रयोग गरेपनि हुन्छ मिटर जडान गरिएको छैन, मासिक दुइ सय रुपैयाँ उपभोक्ताले महशुल तिर्ने गरेको उनले बताए ।

दंगीशरण गाँउपालिका वडा नम्वर –६ का अध्यक्ष रोशनजंग शाहले आफ्ना वडाबासीलाई पानीको सुबिधा पु¥याएको बताए । “चुनावमा एक घर एक धारा दिने भनी नागरिकसँग मत मागेका थियौं सोही अनुरुप पानी पु¥याउन थालेका छौ”–उनले भने । पानीको सुविधा पुगे पनि पूर्वाधार नहुँदा समस्या भएको छ । पानीको ट्याङ्की छैन, पानी भण्डारणको समस्या छ । संघ र प्रदेश सरकारले संरचना निमार्णमा सहयोग गरेमा स्थानीय सरकारलाई केही सहयोग हुने उनको धारणा छ । स्थानीय सरकारसंग पर्याप्त वजेट नहुँदा काम गर्न समस्या भएको उनले बताए ।

खानेपानी तथा सरसफाई कार्यालय दाङका प्रमुख तिलक न्यौपानेले खानेपानी मानिसको पहिलो आवश्यकता भएकाले सबै नागरिकलाई सहज पानी पु¥याउने कोशिस गरेको बताए । कुनै कुनै खानेपानी आयोजना स्थानीय तहसंग सहकार्य गरेर अगाडि बढाएको र कुनैमा बजेट अभावका कारण काम समयमा हुन नसकेको उनले बताए । “बहुवर्षीय योजना निर्माणमा समय लाग्ने भएकाले समयमा सबैलाई पानी पु¥याउन पहल गरिरहेका छौं”–उनले भने । सरकारको ‘एक घर एक धारा’ कार्यक्रम अन्तर्गत सबैको पहुँचमा पानी पु¥याउन खोजिएको उनले बताए ।